అంతా నాదేననుకొంటే
లేదే చింత
అంతా నాకే అనుకొంటేనే
చిక్కంతా

ప్రేమించు
ఫరవాలేదు
అందరిపట్ల చూపించగలిగితే
ఏ ఢోకాలేదు

పార్టీకో పేపరు
సపోర్ట్ గా ఛానలు
ఏం కూసినా
ఆత్మస్తుతి-పరనింద!!

జనం పిచ్చోళ్ళే
తాన అంటే తందాన అంటారు
బుర్రలేకుండా
తందామంటారు!!

ఎదురీదే వాడి
కెన్ని దెబ్బలు!
సంస్కరిద్దామన్నప్పుడల్లా
పెడబొబ్బలు!!

మనమెలాగూ
ఎదిరించలేం!
ముందడుగేసినవారినీ
అభినందించలేం!!

వ్యక్తికాదు ముఖ్యం
వ్యవస్థ!
అన్నాహజారే , రాందేవులకూ
తప్పలేదవస్థ!!


విషయమొదిలి
అరుస్తారేల?
గుమ్మడి దొంగలయ్యీ
జబ్బ చరుస్తారేల??

చెలియలి కట్టుందని
సంబరపడకు
సునామి వస్తే
కడలి కడకు ?!

ముగ్గురి సీటు నల్గురిదైంది
స్నేహం పంచితే!
ఇద్దరికిరుకే
విస్మరిస్తే !!

కూడు గుడ్డా
నువ్వేసే భిక్షే కదా!
ఈ బతుకు
ఓ రైతు బిడ్డా!!

విత్తులెరువులెండ్రిన్లు
మద్దతు ధరలు
నిత్యం రణాలే!
చావుక్కారణాలే!!

థింక్ పాజిటివ్


రాజుగారి పెద్ద భార్య
పతివ్రత
మరి చిన్న భార్య
మహా పతివ్రత!!

గ్లాసులో సగం
నీళ్లు లేవనుకొంటే నిరాశ
సగమున్నాయనుకొంటే
ఆశ!!

అంతా నాదేననుకొంటే
లేదే చింత
అంతా నాకే అనుకొంటేనే
చిక్కంతా