Thursday, December 31, 2009

నవ దశక వత్సరాది శుభ కామనలతో.......

చిన్న ప్రేరణకే
ఎన్నో కవితలు!
మెచ్చుకోలు
తెచ్చు గీతాల వరదలు!!

అందరికీ నవ వత్సర శుభ కామనలు!!

తెలంగాణా రాష్ట్రం తోనే నవశకం..నవ వర్షం...తెలంగాణా రాష్ట్రం లోనే నవనవోన్మేషం జన హర్షం!!
అందరికీ నవ వత్సర శుభ కామనలు!!

Thursday, November 26, 2009

శ్రీ సిద్దివినాయక నమః
శ్రీ ఆంజనేయ ప్రసన్నః
శ్రీ సరస్వత్యైనమః
ఓం శ్రీ స్వామియే శరణం అయ్యప్పా
ఓం సాయి శ్రీ సాయి జయ జయ సాయి
శ్రీమధ్ద్హర్మపురి నారసింహాయనమః

నా-నీ ధర్మపురి నరహరి శతకము

శ్రీ హరి
మాయమ్మ సిరి గురి
నాపై నుంచితే సరి
ధర్మపురి నరహరి (1)

నీ పదముల
కొల్తు నీ పదముల
చేర్చు నను పరమ పదముల
ధర్మపురి నరహరి(2)

మత్స్యావతారమెత్తి
వేదాలను వెదికి తెచ్చి
ఇచ్చావా ధర్మపురిని మెచ్చి
ధర్మపురి నరహరి (3)


కొండ మునగకుండ
తాబేలుగ నీ అండ
దక్కించెను సుధ కుండ
ధర్మపురి నరహరి (4)

ధరణి చెరను విడిపించగ
హిరణ్యాక్షు వధియించగ
వరాహమై వెలసితివిల
ధర్మపురి నరహరి(5)


దితిసుతుని దునుమాడగ
ప్రహ్లాదుడు నిను వేడగ
వెలిసావిట మానీడగ
ధర్మపురి నరహరి(6)

దానమడుగుమని అడుగు
బలితలమోపిన నీ అడుగు
చేర్చెనతని మడుగు అడుగు
ధర్మపురి నరహరి(7)

పరశువునే చేబూని
క్షత్రియులను దునుమాడి
తల్లిదండ్రుల మెప్పించిన భార్గవరాముడివీవె
ధర్మపురి నరహరి(8)

పితృవాక్య పరిపాలన
ఏకపత్ని వ్రత పాలన
శ్రీరామా ఎరిగితిమి నీ వలన
ధర్మపురి నరహరి(9)

చెలుల చీరలు దోచినా
చెల్లికి చీరలిచ్చి కాచినా
చెల్లెను నీకే గోట గిరిని మోసినా
ధర్మపురి నరహరి(10)

బుద్దావతారాన
హింసకెంతొ దూరాన
చేరితివి భవసాగర తీరాన
ధర్మపురి నరహరి(11)

తొలగించగ భువి భారం
నీ కల్క్యావతారం
లేదెంతో బహుదూరం
ధర్మపురి నరహరి(12)


రామాయణం సీత దాటిన గీత
భారతం శ్రీ కృష్ణు చాటిన గీత
జీవితం ఆ బ్రహ్మ గీసిన గీత
ధర్మపురి నరహరి (13)

బాలానందం బ్రహ్మానందం
నిత్యానందం పరమానందం
కృష్ణా నువు చాటిన గీతా మకరందం
ధర్మపురి నరహరి (14)

నీ ఆకారం భీకరం
మాట మకరందం
మనసు నవనీతం
ధర్మపురి నరహరి(15)

నీ కరమే
అభయకరమే
జనప్రియకరమే
ధర్మపురి నరహరి(16)

కనికరముతొ
కని కరముతొ
దీవించూ నను వరముతొ
ధర్మపురి నరహరి(17)

ధర్మ కాపరి
షడ్రిపు సంహారి
ఎవరయ్యా నీకు సరి
ధర్మపురి నరహరి(18)

స్నానానికి గోదావరి
దైవదర్శనానికి నరహరి
ఉభయ తారకం ధర్మపురి
ధర్మపురి నరహరి(19)


ధర్మపురి దరికొస్తే యమపురి లేదు
గోదావరిసరిమునిగితె నరకం దరిరాదు
నరహరి నిను దర్శిస్తె జన్మే మరి రాదు
ధర్మపురి నరహరి(20)

వేంకటలక్ష్మి మాతల్లి
మమతల పాలవెల్లి
పుట్టాలి తన కడుపున మళ్ళీమళ్ళీ
ధర్మపురి నరహరి(21)

జన్మజన్మలు పుణ్యాలు చెయ్య
అయినావు మాఅయ్య అంజయ్య
మా గురువూ దైవం నీవేనయ్య
ధర్మపురి నరహరి(22)

వంశము గొల్లపెల్లి
గోత్రము భరద్వాజ
తమ్ములు నల్గురిద్దరు చెల్లెళ్ళు
ధర్మపురి నరహరి(23)

గీత
అయ్యె నా జత
కుదిరె నా తల రాత
ధర్మపురి నరహరి(24)

మొదటి ఫలము సిద్దీశుడు
పిదప వరము హరీశుడు
ఇలవేల్పు కొండగట్టు కపీశుడు
ధర్మపురి నరహరి(25)

రామునిలో ఏకత్వం
కృష్ణునిలో భిన్నత్వం
సమతూకం నాతత్వం
ధర్మపురి నరహరి(26)


మా రమా
ఎపుడూ నీదయ కోరమా
భవసాగరమీద మాకిక భారమా
ధర్మపురి నరహరి(27)

సై మసై
మనసున మనసై
మనిషే రుషై
ధర్మపురి నరహరి(28)

ఛందస్సు లెంచకు
అలంకారము ల్లేవనకు
ప్రస్తుతించెద భక్తి ప్రస్తుతంబు
ధర్మపురి నరహరి(29)

నవవిధంబుల భక్తి
నవరసంబుల స్పూర్తి
పదవదిది యని నాకీయి ముక్తి
ధర్మపురి నరహరి(30)

ప్రకటింపలేను ఏరీతి నాభక్తి
మదిలోన నీపైన గలదనురక్తి
నీకు మాత్రం లేదా దానినెరుగు శక్తి
ధర్మపురి నరహరి(31)

పోలిక
చాలిక
నిన్ను నీవే మలచాలిక
ధర్మపురి నరహరి(32)


ఆశిస్తే
మనసున శిస్తే
ఫలితం పస్తే
ధర్మపురి నరహరి(33)

ఈ క్షణం
లో జీవనం
ఆనంద లక్షణం
ధర్మపురి నరహరి(34)

శంఖ చక్ర యుత హస్తద్వయం
దంష్ట్రాకరాళ సింహ ముఖం
త్వం లక్ష్మీ సహ‘యోగ స్థితం’
ధర్మపురి నరహరి(35)

దుఃఖం
బావురు మంటూ హృదయం
బరువు తీరితే సుఖం
ధర్మపురి నరహరి(36)

జననం
మరణం
అన్నింటికి సంపూర్ణం జనానికి భోజనం
ధర్మపురి నరహరి(37)

కులం గోకులం
మతం మానవతం
కావాలి నీతి అందరి జాతి
ధర్మపురి నరహరి(38)

పలుకు తేనెలొలుకు
మనసు విషము చిలుకు
మనిషేల హితుడు మనకు
ధర్మపురి నరహరి(39)

బాధ
కన్నా బాధలొఉన్నామన్న బాధ
ఎక్కువగా బాధ పెట్టే బాధ
ధర్మపురి నరహరి(40)


సమస్య
కు పరిష్కారం కానేకాదొక సమస్య
అంతా కోరుకొనేది అనునయమూ స్వాంతన
ధర్మపురి నరహరి(41)

నిన్నటి చింతన
రేపటి ఆంధోళన
నేటినీ మ్రింగే పూతన
ధర్మపురి నరహరి(42)

రణం
కారణం
సమాచార నివారణం
ధర్మపురి నరహరి(43)

కలిని
ఆ క లి ని
ప్రతిఘటించే రోకలిని
ధర్మపురి నరహరి(44)

ఊసరవెల్లులు
గుడ్లగూబలు గబ్బిలాలు
కేరాఫ్ రాజకీయాలు
ధర్మపురి నరహరి(45)

రాజకీయాల రసవద్ఘ్టట్టం
ద్రవ్యోల్బణానికి
దగ్గరి చుట్టం
ధర్మపురి నరహరి(46)

సబ్బుని
వాడి తొలగిస్తావ్ ఒంటి గబ్బుని
మరి మనసు మాలిన్యం జబ్బుని ?
ధర్మపురి నరహరి(47)


క్రికెట్టూ
సినిమా టికెట్టూ
చేస్తాయి స్టూడెంటుని నిండా మునిగేటట్టూ !
ధర్మపురి నరహరి(48)

వలపుల వల
లోపల చిక్కితే
బ్రతుకు వలవల
ధర్మపురి నరహరి(49)

సిగరెట్టు
రేటు గుండెలదిరెటట్టు
చేస్తే పెంచేట్టు మరి తాగితే ఒట్టు
ధర్మపురి నరహరి(50)

జూదం
అవ్వొచ్చు తత్కాల మోదం
క్లైమాక్స్ మాత్రం సదా విషాదం
ధర్మపురి నరహరి(51)

ఓటు
కాదు తలపోటు
వేయడం మంచి అలవాటు
ధర్మపురి నరహరి(52)

రమ్మని ఆమని తలుపు తీయగ
కమ్మని మామిడి ఆనతీయగ
కూయని కోయిల కూసె తీయగ
ధర్మపురి నరహరి(53)

అయారే! కరినగరి సినారె!!
అద్భుత గీతాలెన్నొ రాసినారె
తెలుగు గజళ్ళకు ప్రాణం పోసినారె
ధర్మపురి నరహరి(54)


కానికి కొరగాడు కాని,
కానివాడు ఎలాగని?
కృషితో వాడూ కుబేరుడు కాని
ధర్మపురి నరహరి(55)

నిన్ను నీవు
గెలువు
ప్రతి విజయం నీ పాదాక్రాంతం
ధర్మపురి నరహరి(56)

విజయాలన్ని
చేకూర్చలేవు ఆనందాన్ని?!
ఆనందం అందించేదే అసలైన విజయం
ధర్మపురి నరహరి(57)

రుచులు ఆరే
వండగలిగితె రోజూ పండగే!
స్వరాలు ఏడే,పాడ గలిగితె చిగుర్చేను మోడే!!
ధర్మపురి నరహరి(58)

వాడిన
పూలు పూజకు వాడిన
నేను నీకు కాని వాడిన!?
ధర్మపురి నరహరి(59)

మనసు భారం
మసాలా పులుపూ కారం
హడావిడి వ్యవహారం లేకుంటే అసిడిటీ దూరం
ధర్మపురి నరహరి(60)

ధీ
నిధీ
లేని బ్రతుకే మనలేనిది
ధర్మపురి నరహరి(61)


అవసరం అవకాశం
పాతాళం తొక్కేస్తాయి
లేదా ఎవరెస్ట్ నైనా ఎక్కిస్తాయి
ధర్మపురి నరహరి(62)

చదివిన కొద్ది చదువు
నీ కొద్దీ చదువు
చదివినకొద్దీ చదివించే చదువు చదువు
ధర్మపురి నరహరి(63)

నిండు కొలువు జనులు జేజేయని కొలువు
కొలువు కదా నిజమైన కొలువు
దారులు కొలువు కొలువు నీవెప్పుడు మానేవు
ధర్మపురి నరహరి(64)

చిక్కని
ప్రేమ ఎప్పటికైనా చిక్కని
భావించనెపుడు బ్రతుకే చిక్కని
ధర్మపురి నరహరి(65)

బిన్ లాడెన్
డెన్ వీడెన్?
ఎచటైనా కనబడెన్!?
ధర్మపురి నరహరి(66)

నేడు నీరు
కొనే తీరు
రేపు గాలికీ తయారు
ధర్మపురి నరహరి(67)

చెలీ నే కొన్నది
కదా నువు కట్టుకొన్నది
నీ చీర నా మనసునెంతో ఆకట్టుకొన్నది
ధర్మపురి నరహరి(68)


ఒబామా
ప్రపంచ శాంతికి నీవే భీమా
ప్రజలందరిదీ అదే ధీమా
ధర్మపురి నరహరి(69)

ప్రతి వారము నీ వారము
అంతా నీ పరివారము
అందుకొ మా కైవారము
ధర్మపురి నరహరి(70)

దక్కన్ గ్రామీణ బ్యాంకు
చిక్కెన్ ప్రజలకి అది తరగని ట్యాంకు
దక్కెన్ సేవలొ దానికి మొదటి ర్యాంకు
ధర్మపురి నరహరి(71)

తెలంగాణ
నాడు మౌన వీణ
నేడు దశదిశల మార్మోగే రుద్రవీణ
ధర్మపురి నరహరి(72)

జాడ పట్టుటకు డేగ
కూడబెట్టుటకు తేనెటీగ
గూడు కట్టుటకు గిజ్జిగ
ధర్మపురి నరహరి(73)

ఎత్తులు
జిత్తులు పొత్తులు
రాజకీయ మహత్తులు గమ్మత్తులు
ధర్మపురి నరహరి(74)

ఔరా! చిరంజీవి !
అవునా రాజకీయ చిరంజీవి
బాగౌనా బడుగు బడుగుజీవి?!
ధర్మపురి నరహరి(75)


ఆశపడితే నోటుకు
అమ్ముడౌతే ఓటుకు
బ్రతుకు బాట చేటుకు
ధర్మపురి నరహరి(76)

కులం అయస్కాంతం
మతం మత్తే సాంతం
జాతీయత చేసుకో సొంతం
ధర్మపురి నరహరి(77)

భాస్కర్రావ్ కొమ్మెర
భక్తికి పట్టుకొమ్మర
స్నేహమూర్తి నమ్మర
ధర్మపురి నరహరి(78)

అసాధ్యం అనేపదం
లేని నిఘంటువు విజయం
సాధ్యానికున్న మితులు కృషి,సమయం
ధర్మపురి నరహరి(79)

చిత్తశుద్ది లేని మాట "ప్రయత్నించడం"
ఇచ్చిచూడు కార్యానికి ప్రాధాన్యం
తప్పకుండ పొందేవు సాఫల్యం
ధర్మపురి నరహరి(80)

‘దయచేసి’
పలుకుమొదట దయచేసి
నడిపించును నీ నడత నల్లేరు బండిచేసి
ధర్మపురి నరహరి(81)

క్షమించు
అంటే ఏమి మించు
ఇరుహృదయాలుపశమించు
ధర్మపురి నరహరి(82)


ఒక్కసారి
చెప్పు సారి(sorry)
చేరును కంచికి స్టోరి
ధర్మపురి నరహరి(83)

సరే
అనడానికి కొసరే
వారు వాదనకి దగ్గరే
ధర్మపురి నరహరి(84)

ధన్యవాదములు
మనసుకు హాయిగొలిపే నాదములు
తెలుపగ మోదములు ఎల్లరకామోదములు
ధర్మపురి నరహరి(85)

క్రౌర్యం,నైచ్యం,హీనం,హేయం
మూర్ఖపు దుర్మార్గం,విశృంఖల దౌష్ట్యం
అన్నికలిపినా సరిపోలనిదే ఉగ్రవాదం
ధర్మపురి నరహరి(86)

ఉగ్రవాదం
వాస్తవ నరమేధం
ప్ర్తతిబింబింపజేయలేని పదం
ధర్మపురి నరహరి(87)

ప్రేరణ నీవే
కారణ మీవే
కవి తల కలంకరణము నీవె
ధర్మపురి నరహరి(88)

తెలుగు పలుకు
ఎపుడు పలుకు
తేనె లొలుకు
ధర్మపురి నరహరి(89)



అరమోడ్చగ రవి కళ్ళు
ఇలకురియగ చిరుజల్లు
విరియునుగా హరివిల్లు
ధర్మపురి నరహరి(90)

పచ్చదనం
స్వఛ్ఛదనం
ఏ మది మెచ్చదనం
ధర్మపురి నరహరి(91)

చెట్టు
చేస్తుంది మనిషి జీవించేట్టు
చేయాలి ఇంటింటా పెంచేట్టు
ధర్మపురి నరహరి(92)

జగతిలోన కాలుష్యం
జనులలోన వైషమ్యం
కావాలిక అదృశ్యం
ధర్మపురి నరహరి(93)

‘కీడెంచి మేలెంచు’ప్రగతికి రోతది
శుభం పలకరా అంటే...-సామెత పాతది
థింక్ పాజిటివ్ పాలసీ ఎపుడూ గొప్పది
ధర్మపురి నరహరి(94)

అందం
చూసేకళ్ళలో
ఆనందం పొందే గుండెలో
ధర్మపురి నరహరి(95)

చెరగని నవ్వులు
గుభాళించే పువ్వులు
ప్రభాసించే దివ్వెలు
ధర్మపురి నరహరి(96)



చిర్నవ్వితే
సొమ్మేం మునిగిపోదు
మర్దవంగ మాటాడితె కొంప అంటుకోదు
ధర్మపురి నరహరి(97)

ఎవరికీ
చెందకపోతే సరి
అప్పుడు నువ్వే అందరివాడివి
ధర్మపురి నరహరి(98)

తామరాకుమీద నీటిబొట్టు
జీవనవిధానం అయ్యేటట్టు
ప్రవర్తిస్తే ఆనందం నీ జత కట్టు
ధర్మపురి నరహరి(99)

మనసు కాదు కోతి
మనసు పెడితే
కాగలదు అది ఒక యతి
ధర్మపురి నరహరి(100)

నాలిక
నాపాలిక
వాచాలతకీ,చాపల్యతకీ
ధర్మపురి నరహరి(101)

ముక్కోటి యేకాశి
గోదాట మునకేసి
నీవిభవాన్ని చూసి తరియిస్తా కనుమూసి
ధర్మపురి నరహరి(102)

నీ దయ
నాపై ఏదయ
నవనీత హృదయ
ధర్మపురి నరహరి(103)

మిరిమిట్లు గొలుపు మెరుపులు నీ కనులు
భువి దద్దరిల్లు ఉరుములు నీ ధ్వనులు
ఎదబీడులు మురియకురియు వానలునీ దీవెనలు
ధర్మపురి నరహరి(104)

నీ అభయ హస్తం
బహుప్రాశస్త్యం
సుఖినోభవంతు లోకాస్సమస్తం
ధర్మపురి నరహరి(105)

కలనైనా రాయాలి నరహరి శతకము
ఇకనైనా వేయాలి సరియగు పథకము
ఎపుడైనా రావాలి దానికి బంగరు పతకము
ధర్మపురి నరహరి(106)

ఆరుబయట పగలు పండగ ఎండకొడుతుంది
పంట చేనులు సిరులు పండగ వానపడుతుంది
సంకురాతిరి పల్లె పండగ చ..చలి పెడుతుంది
ధర్మపురి నరహరి(107)

కోరెడి‘దివి’ నీవె
శతకము రాసెడి కవి నీవె
రాసిన ప్రతి పదము పథము నీవె
ధర్మపురి నరహరి(108)

నొప్పించితినో
జనులనొప్పించితినో
రాఖీ ఇల సెలవీయగ మిము మెప్పించితినో
ధర్మపురి నరహరి(109)

ఇల్లే జైలు
క్రమశిక్షణ విస్తరిస్తె
బ్రతుకే బోరు రోజూ వడ్డించిన విస్తరిస్తె
ధర్మపురి నరహరి(110)

ఏ పని
అదే పనిగా చేస్తే బోరు
ఏ పని లేకపోతె పరమబోరు
ధర్మపురి నరహరి(111)

దేన్నైనా
వదులుకో
నిన్నునీవు మినహా
ధర్మపురి నరహరి(112)

సాధనయే సాధనము సంగీతానికి
ప్రదానమే ప్రధానము జీవితానికి
నిదానమే విధానము ప్రశాంతానికి
ధర్మపురి నరహరి(113)

పట్టెనామాలు
కోర మీసాలు
నరుసయ్యానీకివె మా పొర్లుడు దండాలు
ధర్మపురి నరహరి(114)

నిను చూడని బ్రతుకు దండగ
నన్నే‘వాడ నీ’ మెడను పూదండగ
కురిపించు నీ దయను దండిగ
ధర్మపురి నరహరి(115)

సత్యవతి గుండము
తొలగించును కుజగండము
నిలబెట్టును దాంపత్యము తథ్యము
ధర్మపురి నరహరి(116)

నడిబొడ్డున కోనేరు
డోలోత్సవాల తీరు
తిలకించగ తనివితీరు?!
ధర్మపురి నరహరి(117)



గలగల గోదారి పారు
శ్రుతమగు వేదాల హోరు
శృతిమయ సంగీతాలు జాలువారు
ధర్మపురి నరహరి(118)

కృతి
సంస్కృతి
ధర్మపురి ఆకృతి
ధర్మపురి నరహరి(119)

సృష్టి కర్త బ్రహ్మ దేవుడు
ప్రాణ హర్త యముడు
నిలిచారిట సేవకులై నీవాకిట
ధర్మపురి నరహరి(120)

ఇసుక స్తంభము
అది ఒక అబ్బురము
పాతివ్రత్య నిదర్శనము
ధర్మపురి నరహరి(121)

ప్రహ్లాదుని కాచావట
శేషప్పని బ్రోచావట
రాఖీనే మరిచావట ?
ధర్మపురి నరహరి(122)

మంచికి గల దారులు వెయ్యి
అడ్డదారులిక మానెయ్యి
మంచికి నీవే దారులు వెయ్యి
ధర్మపురి నరహరి(123)

ముందర
పడితే తొందర
బ్రతుకే చిందర వందర
ధర్మపురి నరహరి(124)

తెలుపు
శాంతిని తెలుపు
ఏడు వర్ణాల కలగలుపు
ధర్మపురి నరహరి(125)

కూత
చేత
ఒకటైతే అది సత్యసంధత
ధర్మపురి నరహరి(126)

పుట్టుటే చాలు ధర్మపురియందు
గోదారి స్నానాల భాగ్యమందు
గోవింద నామాలు చెవుల విందు
ధర్మపురి నరహరి(127)

బంధుమిత్రుల పలకరింతలు
పండుగ పబ్బాల పులకరింతలు
దర్శనమిచ్చు ధర్మపురిలొ సంస్కృతికళల మేళవింతలు
ధర్మపురి నరహరి(128)

నిత్య కళ్యాణం
ప్రత్యక్ష వైకుంఠం
ధర్మపురి వీక్షణం
ధర్మపురి నరహరి(129)

ఏదైనా ఇవ్వడం
మనసారా నవ్వడం
నేర్పవే అందరివాడి నవ్వడం
ధర్మపురి నరహరి(130)

Thursday, October 29, 2009

పంచవింశతి వర్ణపు
నానీయే ధర్మవేల్పు
వీపుచరుపు
కొసమెరుపు

ఎక్కడిదబ్బా
ఇంతపరిమళం
ఓహ్!
అది నీ రాక తెలిపే మేళతాళం!!

వర్ణాలు హరివిల్లై
అక్షర తూణీరాలై
వేణుగానాలై
హృదయానందాలై!!

కడలి తీరాలు
కలిపేది వారధి
భూఖండాలు
కలిపేది జలధి?!

“జలగీతం”
ప్రజలగీతం
సంఘ రుజల గీతం”
’గో పి’క ల జల గీతం!!!

’జలగీతం’కే
ఆస్కారం
తగిన సంస్కారం
“సాహిత్య అకాడమి పురస్కారం”
మనసున్న చోటే
మందలింతలు!
అభిమానముంటేనే కదా
అక్షింతలు!!

రైతుక్కష్టమే
వానలూ, తుఫానులూ!
రావడమిష్టమే
బస్సులూ,ట్రాఫిక్కులూ!!

Friday, September 18, 2009

ఇదీ తెలుగుదేశం
(వచన పద్య శతకము)
రచన : రాఖీ
వివరాలు:
రచన:ఇదీ తెలుగుదేశం(వచన పద్య శతకము)
రచయిత: గొల్లపెల్లి రాంకిషన్
కలంపేరు: రాఖీ
విద్య:సైన్స్ లో పట్టా
రచనా కాలం:1982-83
జననం:కరీంనగర్ జిల్లా,ధర్మపురి పుణ్యతీర్థ-క్షేత్రస్థలి లో
అటు గోదావరి గలగలలు- ఇటు నరహరి చల్లని దీవెనలు
జననీ జనకులు: శ్రీ గొల్లపెల్లి అంజయ్య గారు, శ్రీమతి వేంకట లక్ష్మిగారు
జన్మతేదీ: 02-05-1962(officially) 09-05-1963( actually)
ప్రవృత్తి: స్నేహాభిలాష
ఇతర రచనలు: రాఖీ గీత మాలిక , మనోదర్పణం
పూర్ణిమ ప్రచురణ-కరీంనగర్
నటరాజ్ ప్రింటర్స్, వరంగల్.
First Edition: Jan-1983.





కన్నుగుడ్డి కాలు కుంటి
కదరా బ్రదర్ నిన్నమొన్న
మేలుకున్నది ప్రజానీకం
ఏలుతుందిక తెలుగు దేశం!!
NTR –Photo
తెలుగుదేశాన్ని వెలుగు దేశంగా రూపొందించడానికి కంకణ ధారియై ప్రజామోదంతో ముఖ్యమంత్రిగా పదవీ బాధ్యతలను స్వీకరించిన సందర్భంగా శ్రీ నందమూరి తారక రామారావు అన్నగారికి శుభాకాంక్షలతో...................................రాఖీ






ముందు మాట
చిరంజీవి గొల్లపెల్లి రాంకిషన్ బియస్సీ తుది సంవత్సరంలో చదువు చున్నాడు.ఇతడు ధర్మపురి నివాసి.నేనొక తడవ ధర్మపురి కార్యాంతరమున వెళ్ళినప్పుడు పూజ్యులు బ్ర||శ్రీ|| కాకర్ల లక్షీ కాంత శాస్త్రి గారి ఇంటికి వెళ్ళియుంటిని. అచ్చట తానీ యువ కవి నాకు తన కవితను వినిపించగా వినుట తటస్థించినది. విన్నంతసేపు ఇంకా వింటే బాగుండుననిపించినది.పద్యాలో ,గేయాలో ,వచన కవితలో ఇతడేమి వ్రాసినాడో నాకు ఆ ఛందస్సుపై భావము పోలేదు.ఎంతసేపు ఇతడు స్వార్థపరుల నధిక్షేపించుచు వ్యంగ్య ధోరణిలో విరచించిన భావపరంపర నా హృదయాన్ని స్పందింపజేసిన దనుటలో అతిశయోక్తి ఆవంతయును లేదు.
ఇతడొక మంచి భావుకుడైన కవి. ఇతని కవితా శక్తి సమర్థమైనదనియు, ఇతనికి కవితా జగత్తులో ఉజ్వల భవిష్య్త్తు కలదని నా మనస్సు భావించినది. ఆనందించినది. ఈ కవి కవితలలో నుక్తిచమత్కృతి మరియు భావ సంపద చెట్టపట్టాలు గట్టుకొని పయనించు చుండుననుటకు కొన్ని పద్యముల కొన్ని గేయముల మచ్చుగా నిట నుదహరించుట నావిధి.
“ నీ దారి ఎడారిగా మారితే
గ్రీష్మఋతువు హేమంతమైతే
కన్నీళ్లతో దప్పిక తీర్చుకో
ఆకలి మంటతొ చలికాచుకో బ్రదర్ ! ”
ఇది ఒక వచన పద్యము. ఐనా ఇందులో చక్కని భావము ,సమాజ స్పృహ కల్గి యున్నది.ఆకలి మంటతొ చలి కాచుకొనుట , కన్నీళ్ళతో దప్పిక తీర్చుకొనుటలనే ఈ ఉక్తివైదగ్ధ్యము కడు క్రొత్తది.ఒక మాహా భావుకుడైన కవిగా ఇందులో నితడు దర్శన మిచ్చుటలేదా ! ప్రతిభా వంతుడైన కవియే ఇట్లు చెప్పగలడనుట నిస్సందేహము.
“ నీ వెనకగ నుయ్యెవరో త్రవ్వితే
నీ ముందొక గొయ్యే యెదురైతే
ఈత వచ్చి ఉంటే నూతిని ఎంచుకో
చేతకాకుంటే గోతినే ఎన్నుకో బ్రదర్ !”
ఓహో ఎంత చక్కని నిర్వచనము.వెనక నుయ్యి ముందు గొయ్యి తోచదనువారే సామాన్య మానవులంతా కాని క్రాంతదర్శి యైన కవి భావన తిలకించండి. దానికి నిష్క్రియ నుపదేశించు చున్నాడు. ఏమది? నీకు ఈత వచ్చి ఉంటే నూతిలో ఈదాడుచూ వెళ్ళిపొమ్మంటున్నాడు.ఇది కవి దృష్టి....... ఇంకొకటి>
ఇతడీ శతకము నందు వ్యంగధోరణిలోను చక్కని కవితల వెలయించినాడు. అందుండి ఒక వచన కవితను మచ్చుగా నుటంకింతును.
“ వెలగని అగ్గిపుల్ల
మొరగని కుక్క పిల్ల
నురుగురాని సబ్బుబిళ్ళ
నిక్కముగ నొక్క తీరె గదరా బ్రదర్ ! ”
ఇంతకు ముందు శ్రీశ్రీ మహాకవి అగ్గిపుల్ల .సబ్బుబిళ్ళా ,కుక్కపిల్లా, అన్నీ కవితా వస్తువులే అన్నాడు గాని వాని కవితాత్మను వెల్లడించలేదు.ఈ కవి దీనిలో నిన్న కవితాత్మను బయల్పరచినాడు. చిత్తగించవలె సహృదయులు.
అగ్గిపుల్ల వెలగని దేమి ప్రయోజన కారి? అదేమి దారి చూపించగలుగును?అట్లే మొరగని కుక్కపిల్ల తో నేమి గృహ రక్షణము జరుగును? నురుగు రాని సబు బిళ్ళ తనేమి వస్త్ర మాలిన్యము దూరము చేయ గలుగును?
అట్లే అసమర్థులైన ప్రభుత్వాధినేతలు లోకమునకేమి మార్గ దర్శకులగుదురు? ఏమి దేశ రక్షణము చేయ గలరు? దేశమాలిన్యము నేమి కడిగి వేయ గలరు? అని వ్యంగ్యముగా విమర్శించినటులైనది .ఇది ఉత్తమ కవి లక్షణము గదా !.మొదటి కావ్య కవితయే ఈతనిదింత ఘాటుగా నున్న మును ముందు గడతేరిన ఇతను కవితా లేఖనము అత్యంత ప్రౌఢత నాకళించుకొని సహృదయ హృదయా వర్జకముగానుండు ననుట లెంతయు వాస్తవము.ఇట్లే దేశీయుడైన సోదర మానవుని “” బ్రదర్”” గా సంబోధించి ప్రగతి శీల వర్తనము నుపదేశించు వైతాళికుడీ కవి యనుటలో విప్రతిపత్తి లేదు. ఇతనికి మును ముందు మహోన్నత కావ్య పంథాలలో విహరించు ఆత్మ శక్తిని ప్రసాదించి ధర్మపురికేకాక యావదాంధ్రకు కీర్తి నిచ్చు చక్కని కవివరునిగా నొనరించు ఆయురారోగ్య విద్యావిజ్ఞానముల ప్రసాదించ ధర్మపురి నరసింహుని ప్రార్థింతు- -ఇతిశమ్

“ అభినవపోతన , విద్యావచస్పతి ”
డా|| శ్రీమాన్ వనమామలై వరదాచార్యులు తేదీ:13-01-1982. చెన్నూరు: ఆదిలాబాదు(జిల్లా) (ఆం.ప్ర.)

చెప్పనవసరం లేని మాట
ఛందో బంధోబస్తులనుండి భావ దారిద్ర్యపు ఇనుప పంజరాల నుండి స్వేఛ్ఛ నిస్తూ వచన కవులు ఎగురవేసిన వచన కవితా కపోతం జవం తరిగి రెక్కలు విరిగి నేలకు ఒరిగేలాఉంది. “ నియతలేని స్వేఛ్ఛ నిప్పుతో చెర్లాట “ గా మారింది . కవిత్వానికి ఉండవలసిన ప్రాథమిక లక్ష్యం దెబ్బతింది. భావమే కవిత్వమని , లేదా అబిప్రాయ ప్రకటన మాత్రమే కవిత్వమని ఒక దురభిప్రాయం ఏర్పడే స్థితి దాపురించింది. కవిత్వం అనుభూతికి విడాకులిచ్చింది. “ అర్థాలు గదిలో విడిచి వ్యాహళికేగు శబ్దావళులు కవిత్వం అయ్యాయి.
కవి సమ్మేళనాల్లో ఒకటో రెండో కవితలు చదివి , పది కవితలు రాయగానే పురిటిలోనే అచ్చుబోసి ఆబోతుల్లా దేశం మీదికి వదిలేస్తున్నారు, నేటి కవులు.
ఉక్తిచమత్కృతి కవిత్వానికి ప్రాణం. ఈ లక్షణం సాధారణమైన మాటలనుండి కవిత్వాన్ని వేరు పరుస్తుంది. ఉదాహరణకు “ నిజం చెప్తే నేరమవుతుంది “ అనే మాటను రెండురెళ్ళు నాలుగంటే జైళ్ళు నోళ్ళు తెఱిచే చోటు “ అంటే ఆహ్లాదం కలుగుతుంది. ఐతే కవికి బలమైన సామాజిక స్పృహ తోటి సామజిక చైతన్యమే లక్ష్యంగా రచనలు చేసే శక్తి ఉన్నప్పుడే ఆ కవి కవిగా నిలబడగలుగుతాడు.
మాత్రా ఛందస్సులతోటి ఈ శతకం రాయలేదంటూ చెప్తున్న ఈకవి తాను రాసిన కవితలు గతిని అక్కడక్కడా నిరూపిస్తున్నా వచన కవితే అంటున్నాడు.వచన కవిత్వపు శతకమైన ఈ పుస్తకం ప్రక్రియలో కొత్తదైనా ఇంకా స్పష్టమైన రూపంలో లేదు. ఇంట్లో ఏం మాట్లాడినా పది మంది కూర్చున్న సభలో మాట్లాడేటప్పుడు జంకు పుడుతుంది.కారణం తన మాట జనంలోకి పోతున్నదని తాను బాధ్యతా యుతంగా ప్రవర్తించాలని భావించడమే. అలాగే ముగ్గురు నలుగురు శ్రోతల నడుమ కూర్చున్న కవికి తన కావ్యం అచ్చువేసి జనంలోకి పంపుతున్నప్పుడు కూడ ఇదే జంకు అవసరం.ఇంకా పొదగకముందే గుడ్డును తొందర పడి చితక గొట్టుతున్నావని నేనీ కవికి చెప్పినప్పుడు అతనిలో తన పుస్తకం అచ్చుకావాలనే తపననే బాగా గోచరించినది. ఇది ఏ కవికైనా సహజమే, మంచిదే! రాఖీకి తన లోతు తాను తెలుసుకొనే అవకాశం వచ్చింది.
“అడుగుకో దేవుడు అవతరించె, గడపకో బాబా దర్శన మిచ్చె “ వంటి సామాజిక రుగ్మతల చిత్రణం ,” ప్రతి కవి కథనం లో సాంతం ప్రతి బింబించును జీవితం “ వంటి సత్యాలు చెప్పడంతో బాటు , “ చెప్పేద్దాం ప్రయత్నాలకి ఉద్వాసనలు , దొరకవు మనకిక యే ఉద్యోగాలు మొదలెడదాం మరి ఉద్యమాలు “ వంటి నిస్పృహ లోంచి పుట్టిన వెలుగు జిలుగులు కూడా విరజిమ్ము తున్నాడు.
అయితే “ వంతావార్పూ వస్తేనే వనిత “ లాంటి సూక్తులు “ శివ శివ అనుకొంటే అది భక్తి , హరి హరి అంటే పొందేవు ముక్తి , శ్రీ శ్రీ మాట వింటే యువత కు శక్తి “ వంటి పంక్తుల్లో ఉత్తర దక్షిణ ధృవాలను కలుప జూసే భావ వైషమ్యత కవి అపరిపక్వతను సూచిస్తున్నయి.
“ కులాలు జనతను కూల్చివేసు , మతాలు మనిషిని మంట గలుపు “ వంటి వాస్తవాలు చిత్రించ గలిగిన ఈ కవి తనలోని ప్రతిభకు మెరుగులు పెట్టుకొని ఇంతకంటె చక్కని కవిత భవిష్యత్తులో అందిస్తాడని ఆశిద్దాం-
సంగనభట్ల నర్సయ్య
ప్రిన్సిపాల్
శ్రీ లక్ష్మి నృసింహ సంస్కృతాంధ్ర కళాశాల 15-01-1983 ధర్మపురి,కరీంనగర్ (జిల్లా) (ఆం.ప్ర.)








రాఖీ పలుకులు
నేను చూచిన లోకం బహు తక్కువ
కాని చెప్పేను తోచిన దాన్ని ఎక్కువ
మనిషిమనుగడయే నా మక్కువ
నిక్కముర నామాట వినుకోర బ్రదర్!

ప్రతి కవి కథనం లో సాంతం
ప్రతిబింబించును జీవితం
పత్రికల్లో అది ప్రచురితం
ఇలలోని సంగతులు ఇంతేర బ్రదర్!

వానమామలై వరదాచార్యులు
కవితానదీ వరదాచార్యులు
ఉత్ప్రేక్ష సరదా చార్యులు
“అభినవ పోతన బిరుదాచార్యులు బ్రదర్!

ప్రాసకు దాసులమైనా
భాషకు బంధీలమైనా
కాసులకే కవిత చెప్పినా
భావం చెడనీకు ఓ పిచ్చి బ్రదర్!
ఎందరో మహాను భావులు......................!
“ధనమేరా అన్నిటికీ మూలం” అన్న నిజం ప్రకారం ఈ పుస్తకం లోకాన్ని చూడాలన్నా లోకం ఈ పుస్తకాన్ని ఇలా చూడాలన్నా డబ్బు అవసరం.నా మీద ఉన్న అభిమానంతో 500/- రూపాయలు సహాయమొనర్చిన మా రాజత్త హన్మంతు మామలకు అట్లే ప్రేమతో 500/- రూపాయలు ఇచ్చిన మా బాపు గొల్లపెల్లి చిన్న హన్మాండ్లు ఆయి రత్తమ్మలకు నా ధన్యవాదాలు.
ఈ పుస్తకానికి ’ముందుమాట’ వ్రాసి ఇచ్చి ఈ పుస్తక ప్రచురణకై ప్రోత్సాహాన్ని కలుగజేసి నాలోని ’జంకు ’ ను దూరం చేసిన “అభినవ పోతన శ్రీమాన్ వానమామలై వరదాచార్యుల
వారికి నా కృతజ్ఞతాంజలులు.
చెప్పనవసరం లేదంటూ ఎంతో చెప్తూ నా కవితలోని లోటు పాట్లను నిస్పక్షపాతంగా ఎత్తి చూపుతూ నా ప్రగతికి దోహదం చేస్తున్న సోదరతుల్యులు శ్రీ సంగనభట్ల నర్సయ్య ప్రిన్సిపాల్ గారికి నా హృదయ పూర్వక కృతజ్ఞతలు.
తగిన సలహా సహకారముల నొసగినటువంటి “ చిత్రిక “పురాణం రామచంద్ర “ గారికి , సుధాశ్రీ గారికి నా కృతజ్ఞతాభి వందనములు.
అందంగా అచ్చుతప్పులు లేకుండా ప్రచురించి ఇచ్చిన ’నటరాజ్ ప్రింటర్స్ ’ వరంగల్ వారికి నా ధన్యవాదాలు.
ఈ చిన్ని పుస్తక ప్రచురణలో ప్రత్యక్షంగా, పరోక్షంగా పాలు పంచుకొని సహాయ సహకారాలను అందించిన “ ఎందరో మహాను భావులు! అందరికీ వందనాలు!! “

మీ
రాఖీ


అంకితం
నాలోని
కవితను
ప్రోత్సహించి
ప్రగతి దారుల
పయనింపజేసిన
సుప్రసిద్ధ పౌరాణికులు
ఖ్యాతినొందిన కళాకారులు
బ్ర|| శ్రీ కాకర్ల లక్ష్మీ కాంత శాస్త్రి
తాతగారికి
భక్తితో
-రాఖీ

*******రచనా కాలం 1980-1982 అని గమనించ గోరుతాను********
నిర్వచనాలు
1. అ(Up)ప్పిచ్చువాడె అసలైన వైద్యుడు
చెప్పులపై చిత్తమున్న సిసలైన భక్తుడు
ట్యూషన్లు చెప్పువాడె నిజమైన టీచరు
ఇలలోని నిజమిదిర వినుకోర బ్రదర్!

2. సిగ్గు విడిచిన వాడు సినీస్టారు
బుద్దిలేనివాడు విద్యామినిష్టరు
ఒకరిద్దరినైన చంపువాడె డాక్టరు
వినుకోర నామాట విశదముగ బ్రదర్!

3. అరవై ఏళ్ళుంటేనె సినిమా హీరో
ఇరవై పళ్ళూడితే పొలిటికల్ బ్యూరో
యువతస్థానం అన్నిటా జీరో
ఇలలోని నిజమిదిర వినుకోర బ్రదర్!

4. ఆరడుగులున్నవాడె ఆడపిల్లకు హీరో
కల్గియుండాలి అతడు కనీసం ఏ ఫియట్ కారో
తాగుతూ ఉండాలి ఎపుడూ విస్కీయో బీరో
కలికాలపురీతి నేమందు గదరా బ్రదర్!

5. వంటావార్పూ వస్తేనే వనిత
కంతనీరొలిపితే కలదు మమత
పంటాపైరు నిలిస్తె లేదు మనకి కొఱత
వినుకోర నామాట విశదముగ బ్రదర్!

6. శివశివ అనుకొంటే అది భక్తి
హరిహరి అంటే పొందేవు ముక్తి
శ్రీశ్రీ మాటవింటే యువతకు శక్తి
వినుకోర నామాట విశదముగ బ్రదర్!
7. ఉద్యోగం పురుష లక్షణం
వియోగం విరహ లక్షణం
వివాదం వనిత లక్షణం
ఇలలోని నిజమిదిర వినుకోర బ్రదర్!

8. Tea కై చరించువాడు టీచరుడు
ఏకీలుకాకీలు పీకెవోడు వకీలు
మానము వదలినవాడె మానవుడు
ఎరిగిమెలగురా వెర్రి నా బ్రదర్!

9. లెగ్ ఫ్రాక్చర్ చేయించుకునెవోడు లెక్చరరు
పండ్లో దండ్లో ఇచ్చుకునెవోడు కండక్టరు
ప్రాజెక్టు ఒకటైన కూల్చినోడె కాంట్రాక్టరు
ఎరిగిమెలగురా వెర్రి నా బ్రదర్!

10. ఓర్పు గలవాడె భువిని ఉత్తముడు
అహంకారమున్నవాడు మధ్యముడు
అవహేళనము జేయువాడు అధముడు
ఎరిగిమెలగురా వెర్రి నా బ్రదర్!

11. చుక్కలేనిదె బుక్క మింగనివాడు
చుక్క రానిదె పక్కజేరని రేడు
చక్కని వాగ్దానాలు నినాదాలిచ్చువాడు
పక్కానాయకుడు గదరా బ్రదర్!
నిరర్థకాలు
12. అక్కరకు రాని చదువు
కైపెక్కించగ లేని మధువు
నచ్చీనచ్చని వధువు
నిక్కముగ ఒక్కతీరె గదరా బ్రదర్!

13. వెలగని అగ్గిపుల్ల
మొఱగని కుక్కపిల్ల
నురుగురాని సబ్బుబిళ్ళ
నిక్కముగనొక్కతీరె గదరా బ్రదర్!

14. దుర్మార్గుడు చెప్పునీతి
పట్టపగలు కలుగు భీతి
సిగరెట్ పెట్టెమీది
’హెల్త్ కాషన్ రీతి కదరా బ్రదర్!

15. తొణికిన స్వప్నం
పగిలిన అద్దం
రగిలిన హృదయం
నిక్కముగ నొక్కతీరె గదరా బ్రదర్!

16. అ’హింస’ లో హింస ఉంది
అ’సత్యం’ లో సత్యముంది
నందియె పంది నేడు పందియె నంది
ధర్మ సూక్ష్మమిది ధరలోన బ్రదర్!

వాస్తవాలు-నీతి
17. ఎలక్షన్లు రాగానే వత్తురు నాయకుల్
ఎలక్ట్రిక్ బల్బులతొ వెల్గును మీ వీథుల్
ఎలకలన్ని కట్టాలి పిల్లి మెడలొ గంటల్
వినుకోర నామాట విశదముగ బ్రదర్!

18. శంకుస్థాపన జరిపి నేటికి పదో ఉగాది
ఫాక్టరీ స్థాపనకు వెలిసె నేడె పునాది
పాతికేళ్ళపిదప పక్కనే మంత్రిగారి సమాధి
’పాడె’య్యర చరమ గీతి ఫాక్టరీకి బ్రదర్!


19. ఏ కళాశాల లోనైనా క్రికెట్ కామెంటరే
ఆహా( ! ఆఫీసుల్లోకూడా అదే వింటారే
దానికై ఎంతపనున్నా సరే మాను కొంటారే
క్రికెటె జీవితమాయె నేడు గదరా బ్రదర్!

20. ప్రాణంతీస్తోందయా రా(ఆ)కాశవాణి
ప్రతి ఇంట్లో అది పట్టపు రాణి
భరించలేమిక దాని వాణిజ్యధోరణి
హత్యచేయర ఆలసింపక అరివీర బ్రదర్!

21. దూడతప్పిన కేసులు నాలుగు
ఆక్సిడెంట్లు చావులు మరో ఆరు
అడ్వర్టైజ్ మెంట్లు పేజికో పదారు
దిన పత్రికల దుస్తినేమందు బ్రదర్!

22. ఏ అడ్వర్టైజ్ చూసినా శ్రీ సినీ తారే
షేవింగ్ మిషనైనా సరె ఆమె పేరే
అయారే సినీ తారల స్థితి ఎంతదిగజారే
హరిహరీ వారినేమందు గదరా బ్రదర్!
23. నిన్నటి శంకరాభరణం
సినీవాకిట మంగళతోరణం
కళామతల్లికి కంఠాభరణం
ప్రణుతించ పదములె కరువాయె బ్రదర్!

24. తీసిన ప్రతి సిన్మా హిట్ కాదు
రాసిన నవలల్లా పోటీ గెలవదు
చూసిన ప్రతి ఆడదీ బ్యూటీ గా ఉండదు
పట్టిందల్లా బంగారంకాదు కాదు పిచ్చి బ్రదర్!

25. సిన్మాటాకీసుల్లో సిగరెట్టు పీకలు
పోస్టాఫీసుల్లో పంచబదని జాబులు
సిటీ బస్సుల్లో cut ఐన జేబులు
నిక్కముగ లెక్కలేదు గదరా బ్రదర్!

26. సెక్స్ సినిమాలు తెగచూసి చూసి
బూతునవలలు బాగ చదివి చదివి
రాతల్లొ సామెతల్ని మార్చివేసితివి
’బూతుమయం జగతని ’బుచ్చి బ్రదర్!
27. అడుగుకో దేవుడు అవతరించె
గడపకో బాబా దర్శన మిచ్చె
మనిషికో *“సిద్దేశ్వరీయు” వెలిసె
ప్రతిమనిషీ దైవమె గద మహిలో బ్రదర్!
(*తులసి నవలలో లాగ)
28. ఇందులేదు ఎందుగలదని
సందేహమె వలదు వలదు
ఎందెందు కోర అందే అగుపించు
సర్వాంతర్యామిరా ’కల్తీ’ చిట్టి బ్రదర్!

29. ప్రజాసేవయే ప్రథమ కర్తవ్యమని
బజారున పడ్డాయి బడాయి బస్సులు
నిజానికి ఆర్టీసికి అర్పించాలి జోహారు
ఆదర్శసంస్థ మనకది కదరా బ్రదర్!

30. ఏ సరకున ఎంత దోచినా
ఏ బ్యాంకున ఎంత దాచినా
పేదోడి రక్తమది ప్రాణం తీస్తుంది
వద్దు వద్దురా దోపిడి వర్తక బ్రదర్!

31. రక్షక భటుల పనియె రక్షణ
వారికి లేదేమో సరియగు శిక్షణ
అచటచట చూస్తాము వారి భక్షణ
“కంచే చేను మేసినట్లు “ కదరా బ్రదర్!

32. పోలీస్ స్టేషన్ లో మాన భంగాలు
పొలిటీషియన్లకి శృంగ భంగాలు
ప్రగతి విక్ర మార్కుడికి మౌన భంగాలు
భేతాళ లీలలు తాళలేము బ్రదర్!

33. ప్రభుత్వాసుపత్రుల్లో
పనికొచ్చు మందుమాత్రలు
ప్రముఖ వైద్యమిత్రులు
’నేతి బీరకాయ రీతి’ గదరా బ్రదర్!

34. భారతీయునిగ బ్రతుకు వద్దు
ఆడపిల్ల తండ్రిగ అసలు వద్దు
మానవతలేని మనిషిగ జన్మే వద్దు
దైవాన్ని కోరేది ఇదిరా బ్రదర్!

35. మొహమ్మీద చెప్పువాడు మంచి మిత్రుడు
పొగిడెవాడె ఎపుడొ పొడిచివేస్తాడు
ఘాటైనదైనా శొంఠి రోగాన్ని చంపు
ఎరిగి మెలగురా వెర్రినా బ్రదర్!

36. అపకారికి ఉపకారము చేయమంది నానుడి
ఉపకారికి అపకారము వద్దంది న్యూనుడి
ఇది అభ్యుదయ కవి ఆరుద్ర అన్నట్టు వినికిడి
వినుకోర నామాట విసదముగ బ్రదర్!

37. ఇరవై సూత్రాల పథకంతో
దేశపురోగతి తథ్యం తథ్యం
అమల్పరచడంలో ఉంది అసలు సామర్థ్యం
నిక్కముర నామాట వినవేర బ్రదర్!

38. దున్నేవాడిదె భూమి
హలమే వాడికి భాగస్వామి
బలముంటేసరి వాడే భూస్వామి
వినుకోర నామాట విశదముగ బ్రదర్!
39. దేశానికి కర్షక శ్రామిక సైనికులే
దేహానికి గాలీ నీరూ ఆహారములవలె
ప్రగతి భవంతి పునాది రాళ్ళై
జగతిన ఖ్యాతిని నిలపాలి బ్రదర్!

40. ఇద్దరు లేక ముగ్గురు నిన్నటి కథ
ఒక్కరో ఇద్దరో సరి ఈనాటి మాట
ఒక్కరితో ఆపమని రేపటి రొద
అందుకే ’శుభస్య శ్రీఘ్రం’ కదరా బ్రదర్!

41. వరకట్ననిర్మూలనం
వేదికపై ఉపన్యాసం
వల్లకాటిలో వైరాగ్యం
నిక్కముగనొక్కతీరె గదరా బ్రదర్!

42. అసమర్థుడి భార్య అందరికీ లోకువే
అసమర్థులందరూ పనిలేని లోకులే
లోకులంతా కూసే పిచ్చికాకులే
పిచ్చికాకుల గోల మనకొద్దు బ్రదర్!

43. అందాల భార్య ఉండ వేశ్యా సంగమమేల?
ఇంట కమ్మని టిఫినుండ హోటల్ పోవనేల?
చదువ మంచి Book ఉన్న చెడు స్నేహాలేల?
రాజ మార్గముండ దొడ్డిదారి ఏల గదరా బ్రదర్!

44. విచ్చిపోతుంది అందమైన దైనా గులాబి
చంపివేస్తుంది మధురమైన దైనా शराब
నిద్రలేస్తుంది యువతరం अभी अभी
ఎరిగి మెలగురా వెర్రినా బ్రదర్!

45. ఎందరో అందాల దుర్మార్గులూ
అందరికీ మంచోళ్ల వందనాలు
మీతోటె వచ్చిందాళ్లకి మంచిపేరు
పాపం దుర్మార్గులె మంచోళ్లు గదరా బ్రదర్!

46. స్మోకింగ్ ఈ నాడు షోకింగు
తాగితే తాగాలి ఒకసారి భంగు
మంచిమిత్రుడు కదా మనకి గ్యాంబ్లింగు
లోకమేమైన మనకేమి గదరా బ్రదర్!

47. దీపం క్రిందే చిరు చీకటి
పుణ్యానికి పోతె వచ్చు పాపమొకటి
న్యాయస్థానాల్లో అన్యాయాలు పరిపాటి
మున్సిపాల్టి చెంత ముర్కి కాల్వవోలె బ్రదర్!

48. చెప్పేద్దాం ప్రయత్నాలకి ఉద్వాసనలు
దొరకవు మనకిక యే ఉద్యోగాలు
మొదలెడదాం మరి ఉద్యమాలు
ప్రజ సేవకై పదవులెక్కుదాం గదరా బ్రదర్!

49. ఇంటర్వ్యూకి కావాలి మంత్రిగారి ఉత్తరం
ఇంటిలో ఇచ్చుకోవాలి కొంత దక్షిణం
రెంటికి చెడితివా ఇక తూర్పే నీకు శరణం
వినుకోర నామాట విశదముగ బ్రదర్!

50. ప్రజాకవి మనసినారె
నిజానికి నింగిలో తారే
ఆయన్నెవరూ అందుకోరే
ఎగిరి చూడర ఓ మారు వెర్రి బ్రదర్!

51. ఆంధ్రుడెప్పుడు కోరు ఆవకాయ గోంగూర
తమిళుండు గ్రోలు ఇడ్లీ సాంబారు
నార్తిండియన్ కి రొట్టెనె రైస్ తీరు
వినుకోర నామాట విశదముగ బ్రదర్!

52. ఆంధ్రదేశానికి అది అందాల నగరం
ఆ మాటకొస్తే అది భూతల స్వర్గం
వీథులు మాత్రం దుర్వాసనా భరితం
అనుభవించర ఓ మారు యంగ్ బ్రదర్!

53. నగరవాసము నరక తుల్యము
పల్లెసీమయె భువిని స్వర్గము
ఎయిర్ కూలర్ కన్న చెట్టు నీడ మేలు
ఎరిగి మెలగురా వెర్రినా బ్రదర్!

54. అతిథులంటే సిటీ వాళ్ళకి భయం
పల్లెవాసులె వాళ్ల కంటె నయం
అయినా సిటీయే నాగరికతా నిలయం
ఇలలోని నిజమిదిర వినుకోర బ్రదర్!

55. వీథివీథికి వెలిసె పానుషాపు
ప్రతిబజారున ఓ బీరు షాపు
ఆ ప్రక్కనె అగుపించు హోటల్ రూపు
నాగరికత నడిబొడ్డున నాట్యమాడు బ్రదర్!

56. మనమంతా దేశవాసులం
మనలో కొంత భాషాద్వేషులం
మరికొంత కులమత దాసులం
అయినా సమతావాదులం గదరా బ్రదర్!

57. అప్పుచెప్పులరీతి నిక్కముగ నొకతీరు
చూడచూడ వాటి గతులు వేరు
పెరుగునవి అప్పులు అరుగునవి చెప్పులు
ఇలలోని సంగతులు వింతేర బ్రదర్!

58. కుడిపాపం ఎడమయ్యింది
ఎడమ ఎక్కడికో వెళ్లిపోయింది
దేవదాసు పెళ్లి జరిగి పోయింది
తెల్లవారె నింతలో ఓ చిట్తి బ్రదర్!

59. ప్చ్! వందే మా తరం
హు( అందు అందరం నేతలం
పెంపొందు మాతో దేశబలం?
చెబితె వినవేర చిట్టి బ్రదర్!

60. వాహనమునకు ఇందనం అవసరం
విగ్రహమునకు చందనం అలంకారం
గౌరవమునకు వందనం ఆచారం
ఎరిగి మెలగురా వెర్రి నా బ్రదర్!
61. రేపు పరీక్షయన రేయంత చదివేవు
చదివిన వాటిల్లొ సగము మరిచేవు
ఫలితాలు తెలుసుకొని బావురు మంటావు
దప్పిగొన్నప్పుడె బావి త్రవ్వుకొందువ బ్రదర్!

62. ఇంజనీరింగ్ సీటుకు ఇరవై ఐదు వేలు
వైద్యుడగుటకు విదేశాల కేగు
డాక్టరేటుకు ప్రొఫెసర్ దయాభిక్ష కోరు
వినుకోర నామాట విశదముగ బ్రదర్!

63. మంత్రి మారితే చాలు
మారేవిద్యా విధానాలు
నిరసిస్తే జరుగు మేలు
వినుకోర నామాట విశదముగ బ్రదర్!

64. ట్యూషన్లు ఉపాధ్యాయుల పాలు
పై క్లాసు ప్రమోషన్లు విద్యార్థులకు చాలు
డొనేషన్లు విద్యాసంస్థలకు “వేలు”
ఎలక్షన్లు నాయకులకు మేలు కదరా బ్రదర్!

65. దేవాలయాల్లొ చోరులె గలరు
సచివాలయల్లొ సన్నాసులున్నారు
విద్యాలయాల్లొ ప్రబుద్ధులున్నారు
కలికాలపు రీతి నేమందు బ్రదర్!

66. చదివితే చదవాలి యద్ధనపూడి నవల
చూస్తే చూడాలి అక్కినేని నటన
నడిస్తే నడవాలి జయసుధ సరసన
యువతరం కోరేది ఇదిరా బ్రదర్!

67. పెండ్లి చూపుల జోరు
పండ్ల బేరము తీరు
పదిమంది కల్సి పరిశీలించేరు
ప్రతిసారి ఆమె అంగడి బొమ్మనె బ్రదర్!

68. అబ్బాయి అయితె చాలు పదివేలు
పది పాసవుతె మరి మేలు అయిదు మూళ్లు
సంత పశువే ఎంతో మేలు మేలు
వింతకాదిది నిజమురా వెర్రి బ్రదర్!

69. భోజనం లో ఉప్పు
పడుచుపిల్లకు కొప్పు
సగటు మనిషికి అప్పు
ఎక్కువైతే ముప్పు కదరా బ్రదర్!

70. వాళ్ళు చేసేది వియ్యాలు
పెళ్ళిలోనే ఎదురౌను కయ్యాలు
విత్తమువద్ద నే వివాదాలు
మన బ్రతుకులు మారేవి మరి ఎప్డు బ్రదర్!

71. అంతరిక్షంబునకు నెగసె
అంబుధియందును జొచ్చె
పరమాణువునె పగలగొట్టె కాని
మానవతనె మరిచె మనిషి మహిలోబ్రదర్!

72. కులాలు జనతను కూల్చివేసు
మతాలు మనిషిని మంటగలుపు
కలిసి ఉంటెనె కలిమి గలుగు
పాత భావాలు విడువురా పిచ్చి బ్రదర్!

73. లంచం
మట్టి కంచం
కుక్కి మంచం
లేని ప్రపంచం లేదు కదరా బ్రదర్!

74. గుమ్మడి కాయల దొంగంటే
భుజాలు తడుముకొనే తీరు
దమ్మిడీకి కొరగావంటే
జేబులు వెతకకు బ్రదర్!

75. మరచి పోవడం మా జన్మహక్కు
అరచి చావడం మరి మాకె దక్కు
ఎపుడు ఏడ్చె వాడికెవడు దిక్కు
మరువకుర నామాట మదిలోన బ్రదర్!

76. చావాలని పోయాడు నాలాంటివాడు
ఊగేటప్పటికి తెగింది ఉరిత్రాడు
నదిలోదిగితే నడుంవరకే మునిగేడు
కాలదోషము నేమందు గదరా బ్రదర్!

77. ఓర్పుకు మారు పేరు ధరిత్రి
వెన్నెముకనే ఇచ్చె దధీచి
ప్రాణముల్ గొనితెచ్చె సావిత్రి
కథలనీతి గొనవేర వెర్రి బ్రదర్!

78. నాకు తెలియదు దైవానికి నిర్వచనం
తెల్సిందొక్కటె అది ఒక శక్తి స్వరూపం
చేయాల్సింది మరొకటి ఏకాగ్రతాభ్యాసం
దారులు వేరైన గమ్యమొకటె గదరా బ్రదర్!

79. చెప్పెదొక్కటి చేసెదొక్కటి
తప్పుఒప్పుల రూపు ఒక్కటి
పోలికేలేక పొలికేక పెట్టి
’కాళికా’ యందువా చిట్టి బ్రదర్!

80. కలలు జాగరణ వల్లరావు
ప్రేమకు నిరాకరణతోనె “చావు”
కళలు నిరాదరణతొ పెంపుకావు
ఎరిగిమెలగురా వెర్రి బ్రదర్!

81. హద్దులెరుగుతూ ఉండమంటావు
వద్దు వద్దంటు నన్నువారిస్తావు
ప్రేమకు హద్దులె లేవురా
హద్దులుండేది ప్రేమకాదురా పిచ్చి బ్రదర్!

82. అందంగా ఉండటం దీపం తప్పా?
ఆకర్శింపబడటం శలభం గొప్పా?
కాల్చివేసేటి జ్వాలదే ఒప్పా?
ఆలోచించుటె అసలు తప్పుర వెర్రి బ్రదర్!

83. పాటకు ప్రాణం పల్లవి
పాపకి అందం అల్లరి
మనిషికి ఆశే ఊపిరి
మరువకుర నా మాట మదిలో బ్రదర్!

84. భూతకాలం భూతం లా అవుపిస్తోంది
భవిష్యత్తు బెబ్బులిలా ఆవులిస్తోంది
వర్తమానం మనని వెక్కిరిస్తోంది
కాలదోషము నేమందు కదరా బ్రదర్!

85. నీ దారి ఎడారిగా మారితే
గ్రీష్మఋతువు హేమంతమైతే
కన్నీళ్లతో దప్పిక తీర్చుకో
ఆకలి మంటతొ చలికాచుకో

86. నీ వెనకగ నుయ్యెవరో త్రవ్వితే
నీ ముందొక గొయ్యే ఎదురైతే
ఈత వచ్చి ఉంటే నూతిని ఎంచుకో
చేతకాకుంటే గోతినే ఎన్నుకో బ్రదర్!

87. ప్రవర్తింతురు కొందరు పైశాచికరీతి
ఒకరిని బాధించడమే వారికి ప్రీతి
ఎపుడు మారునో వారి జీవన గతి
ఎరుగలేకున్నామురా వెర్రి బ్రదర్!

88. వ్యక్తిగతంగా ప్రతి మనిషి ఎంతో మంచి
సమాజంలో చేరాడా శృతి తప్పిన విపంచి
ఇక చేరలేదు ఎపుడూ వాడి కథ కంచి
ఇలలోని నిజమిదిర వినుకోర బ్రదర్!

89. కలకూ ఇలకూ కడుదూరం
మనిషికి మనసే బహుభారం
ప్రపంచమొక అందాల పంజరం
వేదాంతసార మింతేర బ్రదర్!

90. జీవితమే విషవలయం
ఆశే దానికి నిలయం
కోరికలే గుర్రాలైతే ప్రళయం
వినుకోర నామాట విశదముగ బ్రదర్!

91. విషం దగ్గరుంటే ప్రేమించు
ప్రేమే ఆశను పెంచు
ఆశను విషంగా బావించు
భావనయే బ్రతుకురా బుచ్చి బ్రదర్!

92. ప్రేమించడం పొరపాటు
పొరపాటులే మనకలవాటు
అలవాటులే మనపాల్టి గ్రహపాటు
చిత్తగించవేర చిట్టి బ్రదర్!

93. ధనం ఉంటే దాచుకో
రోగముంటే చెప్పుకో
ప్రేమించకు చచ్చిపో
మరువకుర నామాట మదిలోన బ్రదర్!

94. ప్రేమించగానే పెళ్ళికాదుర
ప్రేమ పెళ్ళీ వేరు వేరుర
సంఘమంటే వేరె లేదుర
సంఘమంటే నీవునేనుర చిట్టి బ్రదర్!

95. తనను ప్రేమించే వాడికన్న
తాను ప్రేమించే వాడితో నున్న
సుఖము కాదు తాను పొందునది సున్న
విప్పిజెప్పవేర వెర్రి బ్రదర్!

96. ఫలించకుంటేనే ప్రేమ
అయినా చలించనిదే అందాల భామ
నిద్ర పట్టించనిదే దోమ
వినుకోర నా మాట విశదముగ బ్రదర్!

97. ఆశ ఉంటే ఫరవాలేదు
ఆశయాలకి కరువా ! లేదు
ఆలోచనలకి అంతం లేదు
ఈ నాటి మనబ్రతుకు లింతేర బ్రదర్!

98. అతిగా ఎవర్నీ నమ్మకు
బ్రతుకంతా చెప్పకు
మనస్సుమాత్రం విప్పకు
మరువకు నామాట మదిలో బ్రదర్!

99. తప్పుచేస్తే ఒక నేరం
సమర్థిస్తే అది మహాఘోరం
తిరిగి చేయకుండుటయె పరిహారం
వినుకోర నామాట విశదముగ బ్రదర్!

100. విప్లవశంఖం పూరించు
ఒక్కొక్కరినే జోడించు
తెలుగు దేశాన్ని నడిపించు
విజయం నీదిర వినరా బ్రదర్!

101. ఏ విద్దె నేర్చినా ఏ ముద్ద మెక్కినా
ఏ మిద్దె చేర్చినా ఏ గద్దె ఎక్కినా
పోవద్దు పోవద్దు మరచి పోవద్దు
మానవత్వము నీవు మరువొద్దు బ్రదర్!

102. న్యాయాన్ని ధర్మాన్ని విడనాడి యైనా
జతగాడు అయినా పగవాడు అయినా
ఆపద యందున్న ఆదుకోవలె గాని
మానవత్వము నీవు మరువొద్దు బ్రదర్!

103. మంచతనమన్న మనసొత్తు కాదు
చెడ్డ వానిలొ కూడ కలదు మంచి
వెదకి చూచిన గాని వెలికిరాదు గాన
మానవత్వము నీవు మరువొద్దు బ్రదర్!

104. పారిపోకోయి ఓయీ పిరికివాడా
తెరని కోర్కెల రేడ పిచ్చివాడ
మానవుడవు నీవు మనిషివోయి
మానవత్వము నీవు మరువొద్దు బ్రదర్!

105. ఆత్మహత్యకు నీవు పాల్పడెద వేల?
ఆరని జ్వాలలు నీలోన రగులుతున్నా
బ్రతికి చలార్చు నీ బడబాగ్ని గాని
మానవత్వము నీవు మరువొద్దు బ్రదర్!

106. కొనుగోలు కాకోయి కన్నెపిల్లకు నీవు
కట్నాలు కానుకలు నీకేల నోయి
కాళ్ళు చేతుల జిగువ నీకుండగా
మానవత్వము నీవు మరువొద్దు బ్రదర్!

107. నీతి నిజాయితులను విడువకన్న
నీవల్ల ఒకరన్న మారిరని విన్న
లేదు అంతకు మిన్న దేశమేమారునన్న
కాన మానవత్వము నీవు మరువొద్దు బ్రదర్!

108. నిజంనిజంగా చెబితే ఒప్పుకోదు జనం
అసహజత్వం అనేది నాలో లేని గుణం
బాధ కలిగించానా కోరేను క్షమాపణం
జనశ్రేయమే మన ధ్యేయమని మరవొద్దు బ్రదర్!

Monday, September 7, 2009

రాజశేఖరుడి స్మృత్యర్థం ఈ వచన పద్యం

రాజశేఖరుడి స్మృత్యర్థం ఈ వచన పద్యం

ఇందిరమ్మఇళ్ళ తో ఇచ్చావు నీడ
మహిళలకు చూపావు అడుగుజాడ
ఆరోగ్యశ్రీతో వదిలించావు రోగపీడ
జన నీరాజనమిదె నీకు బీదరైతుల దేవుడ!

Friday, September 4, 2009

నివాళి-ఈ కవితా కేళి

ఈ ప్రహేళిక – బహు తేలిక

1. దొడ్డు బియ్యం తిన్నోడు
దొడ్డ మనసు రేడు
నడ్డి వంచి
ఒడ్డు చేర్చునెవడు?
2. తెల్గు పంచె కట్టు
మీసం మెలిపెట్టు
చిర్నవ్వు కనికట్టు
గుట్టు కనిపెట్టు?
3. రైతెద చప్పుడు
ఫ్రీ విద్యుత్తెప్పుడు
మాట తప్పడు
మడమ తిప్పందెవ్వడు?
4. సదా నీటి వేటనో
భగీరథ బాటనో
మరో కాటనో
ఉండేదే చోటనో?
5. వ్యవ ’సాయం’
ఇంకి పోని తోయం
రైతు శ్రేయం
ఎవరి ధ్యేయం?
6. రెండు రూకల బియ్యం
పేదలతో నెయ్యం
అందరికారోగ్యం
ఎవరికి సాధ్యం?
7. తా డాక్టరు
సిన్మా యాక్టరు(?)
విశిష్ట క్యారెక్టరు
ఎవరా చీఫ్ మినిష్టరు?
8. ఇందిరా భక్తుడు
రాజీవ మిత్రుడు
సోనియా విధేయుడు
ఏ కాంగ్రేసీయుడు?
9. జనం గుండెలో చిరంజీవి
వరాల బావి
అస్తమించని రవి
ఎవరది?
10. నెలంతా నవ్వే
చంద్ర బాబు
రాజులకే నవాబు
ఎవరో చెప్పు జవాబు?
11. పాద యాత్రలు
క్రొత్త ఒరవడి సూత్రులు
కారు మానవ మాత్రులు
ఎవరు?
12. ఆడపడచు కన్నైనా
అంధుల కన్నైనా
రైతువెన్నుదన్నైనా
ఎవరానే?
13. సంక్షేమ పథకాలు
తీర్చు సంక్షోభాలు
జన జాతకాలు
మార్చే సంతకాలు?
14. ఇందిరా గృహాలు
రాజీవారోగ్యశ్రీలు
పావలావడ్డీలు
ఎవరి వరాలు?
15. వృద్ధులకు సాయం
యువకులకు భత్యం
మహిళాభ్యుదయం
ఎవరి ధ్యేయం?
16. “జన ప్రియ నేతా
అందుకో చేజోత”
ప్రభావిత మీ కవిత
ఎవరి చేత?

Tuesday, August 11, 2009

కరువు రక్కసి
ప్రకృతి కసి
స్వైన్ ఫ్లూ బూచి
వెరసి మనిషి మసి

తైవాన్ తూఫాన్
జపాన్ భూకంపం
స్వైన్ ఫ్లూ విజృంభనం
మరణ మృదంగం

పన్నెండు ప్రళయం
వచ్చే సమయం
జనం మటుమాయం
ఆలోపే విపత్తు మయం

పంట లేకుంటే
కంట నీరే
డబ్బుల్ని తింటామా
పసిడి నంజుకుంటామా

చేదైన పంచదార
గగనమైన పప్పు ధర
కరువే
బియ్యం ముందర

సగటు మనిషి జీవితం
నిత్యం ప్రశ్నార్థకం
మనుగడయే
అయోమయం

ఏల రేపటి భయం
మించనీకు సమయం
ఇక ప్రతి క్షణం
ఆనంద మయం

Sunday, August 9, 2009

నానీల వరదలకు
ఆనకట్ట!
యూనిక్ కవుల
చిట్టా!!(109)

కలవో
నిజముగ కలవో
తీరదు అనుమానం
ఐనా కొలుచుట మానం!!(110)

ఫ్రీగా వస్తే
దేనికైనా ఎగబడతాం
పుస్తకాలైతే
మూలనబెడతాం!!(111)

వనితా లతలకు
వచ్చింది సాధికారత!
కవితకే కావాలి
చేయూత?!(112)

అంతా నీవిచ్చిందేగా
ప్రభూ!
ఇవ్వడమంటే
నాకెందుకంత బాధ!!(113)

అంతా గీతే!
చిత్రం గీసినా
కవిత్వం రాసినా
తత్వం పలికినా!!(114)

సంగీతం
జీవితానికి కొత్తేంకాదు
చావైనా,వివాహమైనా
మేళ తాళాలే!!(115)

శిశువులు పశువులకేనా
సంగీతం!
కురియదా మేఘం
వెలుగుదా దీపం!!(116)

సంగీతానికే
జీవితానికీ
ఎంత సాపత్యం
ఎగుడు దిగుడులే నిత్యం!(117)

వాద్యాల మద్య
శృతి తప్పింది
ఆఫీసంత
రభసే, రసాబాసే!(118)

అందానికి
మేకప్ టచప్ లు
సంగీతానికి
సంగతులు గమకాలు!(119)


స్వరాలు ఏడైతేనే
అన్ని రాగాలే!
వర్ణాలు యాభయ్యారు
నానీల నెన్నరూ?!(120)

పాడే పదము
రాసే పదము
కొలిచే పదము
చేర్చును పరమ పదము!(121)

నొక్కేవాడికీ
చిక్కే వాడికీ
ప్రభూ!ఎంత బాగా
లెక్కలు సరి చేస్తావ్!!(122)

గొంతులో మాధుర్యం
గుండెలో ఔదార్యం
మనిషి కవే
నిజమైన సౌందర్యం!(123)
నిర్వచించ లేనిదీ
వర్ణన సరి పోనిదీ
అనుభూతికె తోచేదీ
అమ్మే!(124)

మకుటమంతా
పసిడిదైనా
జిగేల్మను మణులే!
పఠేల్మను నానీలే!!(125)

నా నీ లేని అవని
ఆనందగని!
నానీకవిని అవని
ఆ చందం గని!!(126)

కమల హాసమే నటనం
ఇలయ రాజసం
సంగీతం!
గీతంఏసుదాసోహం!!(127)

నానీ
అభినవ కుంభ కర్ణుడి గురక
సత్వరమే
వదిలించే చురక!(128)

నానీ
కవితకు కొత్త బాణీ
కరిగే మెత్తని
కమ్మని పేణీ(129)

స్త్రీ
షట్కర్మ యుక్తా
సహ ధర్మపత్నీ!
నవభారత నిర్మాణపు మేస్త్రీ!!(130)

నన్నేమన్నా మానె
అందరి నోటా నానే
నానీల కానె నానే
డా.గోపి ఆనె!(131)

బధిరునికి పాటెలా?
అంధునికి రంగెలా?
అంగడెన్నున్నా
అభిరుచెలా?(132)

అందంగా లేకపొవడం
కాదు శాపం
అందంగా ఉంటే పాపం?!
ఆసిడ్ ప్రతాపం!!!???(133)

ప్రేమించామని
గొంతులు కోస్తారు
కామాంధులు
కాదంటే ఆసిడ్ పోస్తారు!(134)

ఈరాఖీ చందం
ధర్మరక్షాబంధం
సాహితీ మిత్ర సుగంధం
సచ్చిదానందం!! (135)
శివుడు ఢమరుకం
మురళి కృష్ణుడు
వీణాపాణి వాణి
సంగీత ప్రియులే!(81)

అనగనగ రాగం
వృద్దియగు
అందుబాటుతో
అనురాగం?!(82)

బీటలువారినా తూట్లు పడినా
గుండె
బీటు తప్పదుగా!
పాట ఆపదుగా!! (83)

గీతాసారం
జీవన వేదం
సంగీతం
బ్రతుకు నాదం(84)

రాధ ఎందుకంత
ఎడిక్ట్?
మురళీ రవానికా!
కృష్ణుడి గారవానికా!!(85)

త్యాగయ్య శ్యామయ్య
అన్నమయ్య
అందరూ సంగీత స్రష్టలే!
లబ్దప్రతిష్టులే!!(86)

బాల మురళి ఏసుదాసు
సుబ్బలక్ష్మీ
ఎంతమందని స్మరిద్దాం!
ఎవరిని విస్మరిద్దాం!!(87)

గీత సంగీతాలను
పలికాడు కృష్ణుడు
అందుకే ఆయన
దేవుడు!(88)

గీత మేధను
సవరిస్తుంది
సంగీతం
మనసునలరిస్తుంది!(89)

జేసుదాసు గొంతులో
ఎంత మాధుర్యం!
తేనేల వానల్లో
శివుడు మానవుడు?!(90)

నా కవితా గంధం
ధర్మపురితో
జన్మబంధం
అమ్మా నాన్నల ఆశీస్సులందాం!(91)

మోక్షమిస్తా నన్నా సరే
మళ్ళీమళ్ళీ పుడతా
పాట కోసం
పాడడం కోసం!(92)

హరికథలూ బుర్రకథలూ
పురాణాలు నాటకాలు
వాటి చలవే
కదిలె కలమే!(93)

రాఖీ కానుక
మీకీ
నానీల బోయీలు
పాటల పల్లకి!(94)

సహవాస దోషం
అవతలి పార్శ్వం
నా గీతాలు
సంగీతాలు(95)

వీడుకోలు
అంపకాలు
వ్యధాభరితాలు
శివరంజని తోడి రాగాలు!(96)

భాష
బహు కురచ
భావమంతా
వెళ్ళగ్రక్కలేమని మరిచా!(97)

ఆనందపు
బాష్పీభవన
స్థానం దుఃఖమే!
అందుకే ఆనంద భాష్పాలు!!(98)

నవరసాలకూ
ఒకటే గొంతు
మరి కోటి భావాలనెలా
పలికింతు?(99)

సాహిత్యం సంగీతం
ఎక్కడైనా లెక్కలే
ఛందో బంధాలు
శృతి లయ చందాలు!!(100)

అరెరే! వాద్యాలన్నీ
మటుమాయం?
కీబోర్డు రాకాసి
మ్రింగేసింది!!(101)

సంగీతం
నేడెంత సౌకర్యం!
బిట్లుబిట్లుగా
కంప్యూటర్ డిజిట్లుగా!!(102)

పూలు
ప్లాస్టిక్కా?
డోంట్ వర్రీ-బీ హ్యప్పీ!
ఫారిన్ సెంటు స్ప్రే నొక్కా!!(103)

పల్లె పదాలు
పలికె పెదాలు
బాల్యం జ్ఞాపకాల్లో !
మైమరచిన క్షణాల్లో!!(104)

రైతు యాతమేస్తే
గాన తరంగం!
జాలరి వలవేస్తే
జలతరంగం!!(105)

కుక్కుటం
భూపాలం నేస్తాలు!
ఇద్దరూ మబ్బున్నే లేస్తారు
మన నిద్ర దోస్తారు?!(106)

గ్రామఫోన్లు పాత
క్యాసెట్లు ముగిసిన కథ
సీడీల వేడి
ఐపాడ్ దాడి!!(107)

త్రివిక్రముడూ
వామనుడౌతాడా?
రేడియో మారిందిగా
బుల్లి ఎఫ్ఫెమ్ గా!!(108)
అమ్మపాల కమ్మదనం
లాలిపాట తీయదనం
ఎరుగదీ తరం
వివరం!(71)

అలెగ్జాండర్!
ఆగిపోయినావా
కొనసాగుతోందింకా
నానీల జైత్రయాత్ర!(72)

సంకర భాషలు
వంకర భాష్యాలు
అంతా ఎస్సెమ్మెస్ ల
ప్రభావాలు!(73)

గుండెకెన్ని
చిల్లులు పడితేనేం!
గానం మానుతుందా
వేణువు!!(74)

బీడీ
కల్చర్(?)నేర్చుకుంది
సిగరెట్టయి
ఫోజులే కొట్టింది!(75)

కథలకు
కష్టకాలమొచ్చింది
ఆదుకునే
అమ్మమ్మలే లేరు మరి!(76)

నోరు తియ్యబడింది!
చెప్పడం మరిచా
నేస్తాన్ని
విజయం వరించింది!!(77)

మీకు బొత్తిగా
లౌక్యం లేదండి!
అందుకే కదా
నిన్ను కట్టుకుంది!!(78)

సరిగమలంటే
కావు అక్షరాలు
గళ నరాలు మీటితే
మ్రోగే స్వరాలు!(79)

గొర్లకాపరికెలా
తెలుసు
మురళి సంగతులు?
స్వరం దేవుడి వరం!(80)

Thursday, July 30, 2009

పువ్వులో పరిమళం
గొంతులో మార్దవం
మనసవదా
పరవశం!(66)

ఆశ దోశ
అప్పడం వడ
రేట్లు చూస్తే
గుండెల్లో దడదడ!(67)

రాగం అనురాగం
భావం అనుభవం
చేయాలి సదా
సహయోగం(68)

కలం
ప్రసవించింది
కవల పిల్లలట!
నానీలు-గీతాలు!!(69)

ఘనం
జగానికి గగనమే అయితే
అది ఎలాగౌతుంది
ఘనం?(70)

Sunday, July 26, 2009

రైతేల రాజు?
పెట్టుబడిని
గిట్టుబడిని
తూచలేని తరాజు!(61)

సరస్వతీ!
కఛ్ఛపి తప్పిపోయిందా?
మా చిట్టిబాబుకి
దొరికింది కదా!!(62)

నవ్వులు మువ్వలైనయ్
గుండె ఢమరుకమైంది
మనసానంద
తాండవమే!(63)

చాచం కిష్టయ్య
సంగీత స్రష్టయ్య
పోటీకి దిట్టయ్య
ధర్మపురి బెస్టయ్య!(64)

చింతకాయలు రాలాయా!
వింతేముంది?
సంగీతమంటె
అంతే మరి!!(65)

Friday, July 24, 2009

చిరు నవ్వెంత
గొప్పది
బాధలు దాచే
బురఖా తానౌతుంది!(56)

గొంతు గుండా
వస్తే పాట
గుండె కూడ తెరిస్తే
అది తేనెల తేట!(57)

కోపాలు తాపాలు
చుట్టపు చూపుగా వస్తయ్
బిపి,షుగర్లై
ఆక్రమిస్తయ్(58)

త్యాగరాజు
సంగీత జగతికి రారాజు
స్మరించరా జనులు
ప్రతి రోజు!(59)

అన్నమయ్యా!
రసజ్ఞుల కీవె
అన్నమయ్యా
హాయి గొలిపే పున్నమయ్యా!!(60)

Thursday, July 23, 2009

రోగం కుదిరిందా
నాటి సంగీతం
మరి ముదిరిందా
ఇది నేటి సంగీతం!(51)

నాటి పాట
వినేటి పాట
తేనెల తేట!
నేటి పాట ఎందుకనేటి పాట?! !(52)

కఠం జేగంటే
ఎలుగెత్తి పాడిందంటే!
పెదవి విప్పదు
పాడమంటే?!(53)

సినీతార మాత్రం
కాదు లోభి
ఉదారంగా
చూపెడుతుంది నాభి!(54)

బాత్రూంది
ఎంతటి భాగ్యం
ఎంత మంది
నిజమైన కచ్చేరీలు వింది!(55)

Tuesday, July 21, 2009

టెక్నాలజీ
ఆహ్వానించ దగ్గదే!
కాని సంగీతం కూడ
సాఫ్ట్ వేరై పోయిందే?!(46)

సంగీతం
మధురమే
తాదాత్మ్య్పపు
మకరందం చిలికితే!(47)

టీవీలు సినిమాలు
చూస్తే పని పాడే!
బెటర్ ఐపాడే
దానికదే పాడే!!(48)

చిన్ని గుండె లో
ఎన్ని భావాలో
బుల్లి సెల్లు లో
ఎన్నెన్ని భాగ్యాలో(49)

ఏం పనీ పాటా లేదా?
బ్రతుకే పనైంది
పాటనే
కరువైంది!(50)

Saturday, July 18, 2009

ఒకటే వేదం
ఒకటే నాదం
ఒకే నినాదం
మానవతా వాదం(41)

ఐస్ క్రీంలు
శీతల పనీయాలు
గొంతు చెక్కు చెదర లేదా?
నువ్వే బాలు?!(42)

ఏ మున్సిపాల్టీ వాళ్ళు
మట్టు బెడతారు?
ఈ ఉగ్రవాదపు
పిచ్చి కుక్కల్ని!(43)

కోకిల
పాటనేర్చుకుందా!
దాని గురువు
జానకే కచ్చితంగా!!(44)

హృదయ
సాగర మథనం లో
పుట్టిన అమృతం
నా ప్రతి గీతం!(45)

Saturday, July 11, 2009

వేలపాటలు
క్యాసెట్లలో సిడీల్లో
వినే భాగ్యం లేకుంటే
నే తేనె టీగనే!(36)

సరిగమలకు
చూడకు
ప్రస్తారాలు సంయోగాలు
రాగం ఎద సరాగం!(37)

కచ్చేరి బాగుంది
ఇసుక రాలదు
ప్రశంసల జల్లు!
ఆర్ద్రతే నిల్లు?!(38)

పండగే!
గారెలూ బూరెలూ సరే
అక్కలూ బావలూ తయారే
సంతోషం జాడ?(39)

నేరస్తుడిలా
చూస్తారేం?
రాగాలు ఖూనీ చేసాననా!
ఖూనిరాగాలు తీసాననా?(40)

Thursday, July 9, 2009

సరసవంతపు
వ్యభిచారం=సంసారం
బలవంతపు
సంసారం=వ్యబిచారం

Friday, July 3, 2009

గొంతేం
పాపం చేసిందో
పాపం భావ తరంగాలని
ఎందుకు బయట పెట్టలేదో!(31)

పాట లోని
పా మాత్రమే
కనబడుతోంది పాప్ లో
`ట’ టాటా చెప్పేసిందట!(32)

భౌ భౌ లు
ఓండ్రల సౌండులు?
నేనింకా
పాట మొదలు పెట్టందే?!(33)

గతి శృతి సంగతి
పాట !
గంతులు కూతలు అరుపులు
పాప్!!(34)

సంగీతానికి
తరతరాలుగా
తరగని ధనం
సాధనం(35)

Thursday, July 2, 2009

గొంగళి పురుగే
రంగూ రూపూ మార్చుకుందే
కాకి మాత్రం
కోకిల కాలేదా?(26)

అయ్యో
వాడి తల కనబడదేం?
వెతలలో
కూరుకపోయిందేమో!(27)
దేశ పర్యటనం
అద్వైత ప్రభోదం
అశేష స్తోత్ర రచనం
శంకరానీకే సాధ్యం!(8)

ఘంటసాల రోజూ
మా ఇంటికొస్తాడు
భగవద్గీత
పాడుకుంటూ(29)

ప్రపంచం దారి
సూక్ష్మం లో మోక్షం
గ్రామఫోను మారి
ఐపాడ్ ప్రత్యక్ష్యం!(30)

Wednesday, July 1, 2009

సెల్లు సెల్లు కాదు
నేడది విశ్వరూపాన్ని
చూపే
బాలక్రిష్ణుడి బుల్లి నోరు!(21)

సమయం
సగం సెల్లు తింటుంది
మిగితాది
టీవీ పంచుకొంటుంది(22)

అన్నీ అమర్చుకున్నావ్
ఇక ఇప్పుడు
నీ దగ్గర లేని దొకటే
సమయం(23)

స్నేహితులు
బంధువులు
అందరూ ఉన్నారు
నీకు నీవు తప్ప!(24)

విర్రవీగుతున్నావ్ కదూ
నింగీనేలా
వినయం సహనం
చాటుతున్నట్టు లేవూ!(25)

Tuesday, June 30, 2009

ఏ కళకైనా
పరమావధి
పులకరించాలి
ప్రతి హృది! (16)


పాడుట నా వంతు
మరి శ్రోతలను
కాపాడుట
ఎవరి వంతు?(17)

కళలు టైం వేస్టు?!
పిచ్చోడా!
యంత్రానికైనా కావాలిగా
ఓరాయ్లింగూ రెస్టూ!!(18)

కేటాయించిన
శ్వాసల కోటా
ఎప్పుడైపోతే
అప్పుడే టాటా(19)

అల్లోపతి
హోమియోపతి
అన్నీ అయిపోయాయి
ఇక యోగాయే గతి!(20)

Monday, June 29, 2009

తలపు మొలిస్తే
పాటే
తన్మయ మెస్తే
ఇక ఆటే!(11)

వేయించుకో
ఒంటిపై ‘టట్టూ’
దాపరికమే
లేదనేటట్టూ!(12)

ఓటర్లు
జూదర్లు
తాయిలాలు తాయిలాలే
పంచే డబ్బూ సారా పప్పుబెల్లలే!(13)

మావా అంటే
ఎక్కడైనా అనుకో
నాకు
వంగతోట ఉంటే కదా?!(14)

జీవకారుణ్యమా!
నీవెక్కడ?
టైర్ల క్రింద నలిగి
కుక్కలుగా పిల్లులుగా!!(15)

Sunday, June 28, 2009

విత్తు చిన్నదే
ఉనికిని కాపాడితే
అదే
వృక్షమై అవతరిస్తుంది!(6)

జీవితం
తీరని దాహము
తీర్చు‘నది’ఒకటె
అది స్నేహము(7)

కరెంటు పోయిందా
ఎంత భాగ్యం!
ఇక ఖరీదు లేని
క్యాండిల్ లైట్ డిన్నరే!!(8)

కలం
విదిల్చితే కురుక్షేత్రం
గళం విప్పితే
గంగావతరణమే!(9)

పద్యం
హృద్యమే
నానీ దోసిటి నైవెద్యమే
అనుభవైక వేద్యమే(10)

Monday, June 22, 2009

అదోవింత కాదు
ఆడదే!
తల తిప్పకు
మెడ పడుతుంది!!(1)

తెలుగోళ్ళు
ఉర్దులో మాట్లాడారా
తథ్యంగా
అది తెలంగాణే!(2)

తిండి ఇద్దరికీ
సమస్యే
ఒకడికి దొరక్క?
మరొకడికి అరక్క!(3)


రోజూ విప్పలేని
పజిలే !
మా ఆవిడ అర్థం కాని
గజలే!!(4)

క్రీగంటి కాటుకా!
దేవదాసు లెందరిని
మాడ్చి మాడ్చి
మసి చేసిందో!!(5)

Saturday, June 20, 2009

స్త్రీకెంత లౌక్యం
మొదట మొగుడే లక్ష్యం
ఎదిగిన తక్షణం
సంతాన పక్షం!

Wednesday, April 29, 2009

’కవి’ ’తా వి’పంచి -’నవ’తా విరించి-శ్రీశ్రీ (శ్రీశ్రీ శతజయంతి సందర్భంగా-నివాళి) -రాఖీ

కవి’ ’తా విపంచి -’నవతా విరించి-శ్రీశ్రీ
(శ్రీశ్రీ శతజయంతి సందర్భంగా-నివాళి)
-రాఖీ
ఛందో బంధాలను త్రెంచి
కవితా గంధాలను పంచి
భాసించిన శత వసంతాల విరించీ !
ఏమందును శ్రీ శ్రీ నీ గురించి !!
ఏకలవ్య శిశ్యుడనై సంస్మరించి
నమస్సులర్పించెద శిరస్సు వంచి !!!


Tuesday, April 28, 2009

నిత్యం నానే సత్యం

పిప్పి పన్ను నొప్పి
గోరుచుట్టుబాధ
అర్షమొలల శూల
ఇల్లాలి గోల!!

బూటు కంటె
ఘాటు పోటు
నీ చేతిలో ఓటు
అది నీ(నిరసన)కు దీటు

డెంగ్యూ ,చికెన్ గున్యా
బర్డ్ ఫ్లూ ,స్వైన్ ఫ్లూ
వైరసైతేనేం
ప్రతిదీ సైతానే?!

బియ్యం రేటు దయ్యం
పప్పు కొంటే గొప్పే
నూనె దయ మానె
పూట తిన్నామానె!!


కడుపుల్లేంది
కావలిస్తే వస్తుందా?
కుటిల కాంగ్రేస్
తెలంగాణా ఇస్తుందా ???!!!!!!!!!!!!

పైవాడు ప్రాజెక్టులు
కట్టుకుంటూ పోతే…..
ఆడ చెఱువులు!
ఈడ ఎడారులు!!!

Tuesday, April 21, 2009

ప్రే రణము
ప్రేమ రణము
ప్రేమ మరణము
కాదా ప్రేమకారణము

Sunday, April 12, 2009

నానీ నానీలు
రాఖీ చిరు కానుక!
మీకీ
నానీల బోయీలు
పాటల పల్లకి!!

నా నీ లేని అవని
ఆనందగని!
నానీకవిని అవని
ఆ చందం గని!!

పద్యం
హృద్యమే కాదనను
నానీ దోసిటి నైవెద్యం!
అనుభవైక వేద్యం!!

కలం
ప్రసవించింది
కవల పిల్లలట!
నానీలు-గీతాలు!!



అలెగ్జాండర్!
ఆగిపోయినావా
కొనసాగుతోందింకా
నానీల జైత్రయాత్ర!

నానీల వరదలకు
ఆనకట్ట!
యూనిక్ కవుల
చిట్టా!!

మకుటమంతా
పసిడిదైనా
జిగేల్మను మణులే!
పఠేల్మను నానీలే!!

నానీ
కవితకు కొత్త బాణీ
కరిగే మెత్తని
కమ్మని పేణీ


నానీ
అభినవ కుంభ కర్ణుడి
గురక
వదిలించే చురక!

స్వరాలు ఏడైతేనే
అన్ని రాగాలే!
వర్ణాలు యాభయ్యారు
నానీల నెన్నరూ!!

‘నా’లో ఉన్నదీ
‘నీ’లో ఉన్నదీ
ఎద దోచేదా చిన్నది!
‘నానీ’ అన్నది!!
_రాఖీ.
గొల్లపెల్లి రాం కిషన్
305,సప్తగిరి రెసిదెన్సీ,విద్యానగర్,కరీంనగర్.ఆం.ప్ర..

నానీ రాజకీయాలు

అవును తిండి ఇద్దరికీ
సమస్యే
ఒకడికి దొరక్క?
మరొకడికి అరక్క!

కరెంటు పోయిందా
ఎంత భాగ్యం!
ఇక ఖరీదు తక్కువ
క్యాండిల్ లైట్ డిన్నరే!!

ఓటర్లు
జూదర్లు
తాయిలాలు తాయిలాలే
పంచే డబ్బూ సారా పప్పుబెల్లలే!

మావా అంటే
ఎక్కడైనా అనుకో
నాకు
వంగతోట ఉంటే కదా?!

ఏ మున్సిపాల్టీ వాళ్ళు
మట్టు బెడతారు?
ఈ ఉగ్రవాదపు
పిచ్చి కుక్కల్ని!

రైతేల రాజు?
పెట్టుబడిని
గిట్టుబడిని
తూచలేని తరాజు!

ఆశ దోశ
అప్పడం వడ
రేట్లు చూస్తే
గుండెల్లో దడదడ!

బీడీ
కల్చర్(?)నేర్చుకుంది
సిగరెట్టయి
ఫోజులే కొట్టింది!

అయ్యో
అతడి తల కనబడదేం?
వెతలలో
కూరుకపోయిందేమో!

పండగే!
గారెలూ బూరెలూ సరే
అక్కలూ బావలూ తయారే
సంతోషం జాడ?

బిన్ లాడెన్
తన డెన్
వీడెన్?
ఎచటైనా కనబడెన్!?

ఒబామా
ప్రపంచ శాంతికి
నీవే భీమా
ప్రజలందరిదీ అదే ధీమా

ఊసరవెల్లులు
గుడ్లగూబలు
గబ్బిలాలు
కేరాఫ్ రాజకీయాలు

రాజకీయాల
రసవద్ఘట్టం!
ద్రవ్యోల్బణానికి
దగ్గరి చుట్టం!!

ఔరా! చిరంజీవి !
అవునా రాజకీయ చిరంజీవి
బాగౌనా
బడుగుజీవి?!

ఉగ్రవాదం
వాస్తవ నరమేధం
ప్రతిబింబింప
జేయలేని పదం

సిగరెట్టు
రేటు గుండెలదిరెటట్టు
చేస్తే పెంచేట్టు
మరి తాగితే ఒట్టు

అవ్వొచ్చు జూదం
తత్కాల మోదం
క్లైమాక్స్ మాత్రం
సదా విషాదం

కరినారం వా సినారె!
వాసి గీతాల్రాసినారె!!
జ్ఞానపీఠం
ఎక్కేసినారె!!!

ఓటు
కాదు తలపోటు
మార్చు గ్రహపాటు
వేయడం మంచి అలవాటు


ఎత్తులు
జిత్తులు పొత్తులు
రాజకీయ మహత్తులు
గమ్మత్తులు!!


ఆశపడ్తె నోటుకే
అమ్ముడౌతే ఓటుకే
బ్రతుకు బాట చేటుకే!
కాటికే!!

మున్ముందర
పడితే తొందర
కాదా బ్రతుకే
చిందర వందర

మనిషి మనుగడ కెన్ని
ప్రతిబంధకాలు!
కుల,మత,ప్రాంత
కందకాలు!!

నీవు లేకుండా పోవడం
కాదు చావు!
ఆత్మ నశ్వరమను మాట
మరిచావు!!

ఓడలు బండ్లయ్యే
సామెతలు
నిత్యాలు!
ఈనాడు సాక్షి’లేమన’ సత్యాలు!!

రియల్(?)ఎస్టేటులు!
రిలయెన్స్ వాటాలు
ఏమారితే
హర్షద్ మె’’తాలు’’!!

మనసున్న చోటే
మందలింతలు!
అభిమానముంటేనే కదా
అక్షింతలు!!
యత్ర నార్యస్తు ………..!
స్త్రీ
షట్కర్మయుక్తా
సహ ధర్మపత్ని!
నవభారత నిర్మాణపు మేస్త్రీ!!

అదోవింత కాదు
ఆడదే!
తల తిప్పకు
మెడ పట్టుకుంటుంది!!

రోజూ విప్పలేని
పజిల్ !
మా ఆవిడ అర్థం కాని
తియ్యటి గజల్!!

క్రీగంటి కాటుకా!
దేవదాసు లెందరిని
మాడ్చి మాడ్చి
మసి చేశావో!!

వేయించుకుంటారు
ఒంటిపై ‘టట్టూ’
దాపరికమే
లేదనేటట్టూ!

సినీతార మాత్రం
కాదు లోభి
ఉదారంగా
చూపెడుతుంది నాభి!

మీకు బొత్తిగా
లౌక్యం లేదండి!
అందుకే కదా
నిన్ను కట్టుకుంది!!

ప్రేమించామని
గొంతులుకోస్తారు
కామాంధులు
కాదంటే ఆసిడ్ పోస్తారు

చెలీ నే కొన్నది
నువు కట్టుకొన్నది
ఆచీర నాఎదనా
కట్టుకొన్నది!!

మా రమా
ఎపుడూ నీదయ కోరమా
భవసాగరమీద
మాకిక భారమా





రువ్వే
నవ్వులు
గుభాళించే పువ్వులు!
ప్రభాసించే దివ్వెలు!!

ప్రేమంటే ఏమంటే
ఆరని మంటే
అంటుకుంటే
బ్రతుకు కుంటే!

తిడ్తె ప్రేమే
గేలి జాలే
ఈర్ష్య కీర్తెరుగుటే
ఇదే థింక్ పాజిటివ్ అంటే!




జానపదం
ఆనంద పథం!
బతుకమ్మలు బొడ్డెమ్మలు
వాకిట్లో గొబ్బెమ్మలు!!


_రాఖీ.
గొల్లపెల్లి రాం కిషన్
305,సప్తగిరి రెసిదెన్సీ,విద్యానగర్,కరీంనగర్.ఆం.ప్ర..

ట్రాజెడీ?!



వి’నో’దం
వి’షా’దం
మారితే ఒకే అక్షరం
ఏమాఱితే మూల్యం జీవితం

మంచితనమంటే
“ ధార పోయడం ”
శ్రమ, సమయం, ధనం
ఏదైనా-అన్నైనా

కాశ్మీరు షాలువైనా
చీపైన కర్చీఫైనా
అల్ప సంతోషి కవి
ఏం ట్రాజెడీ?!

కత్తి మీకిస్తే
గుండెనూ కోసేయవచ్చు
తిండానికి
పండునూ కోసీయవచ్చు

Thursday, March 26, 2009

“విరోధి” నామ ఉగాది శుభాకాంక్షలు!!

తెలుగు సాఫ్ట్ వేర్
ఇంజనీరి కోరిక
అమెరికా
సిరికా!-ఉరికా?

ఖద్దరు నేసేదీ వేసేదీ
నేతన్నే!
దారులే వేరు
ఉరి-ఎన్నికల బరి!!

ఉరికై ఉరికే నేతన్నా
ఒక్క క్షణం!
ఏదైనా సాధ్యమే
ఉంటే సరి ప్రాణం!!

దేశం కోసమే
సైనికుడు
పదవి కోసమే
రాజకీయ నాయకుడు

నాయకులకు
ఎన్నికల జ్వరాలు
ఓటర్లకు
అడగకున్నా వరాలు!!

దైవ సృష్టి విశ్వం
మానవ సృష్టి కంప్యూటర్
వైరస్ వ్యాపిస్తే
ఫార్మాటింగే !

అభయ హస్తమైనా
సైకిల్ పథకమైనా
స్త్రీ దైన్యమే
ప్రగతి శూన్యమే!!

ఓటేసే వరకే
ఓటరు మారాజు
ఎన్నికలైపోతే
బూజు-రివాజు

స-ని మెట్లు కలిగితేనే
హార్మోని(యం)
నా-ని జట్టు కుదిరితేనే
హార్మోని

స-ని మధ్య
రిగమపద పంచ స్వరాలు
నా-నీ మధ్య
సవాలక్ష మర్మాలు

క్రికెట్ చూస్తే
ఏముంది హర్షం?
అసెంబ్లీ లో
ఆహా( ! కొట్ల దృశ్యం-తిట్ల వర్షం!!

ఎన్నికల్లో
మభ్యపెట్టడం పార్టీల సభ్యత?
’కలే-నా’
తెలంగాణా లభ్యత?!

పెళ్లికని వెళ్తే
బారసాలకి చేరినా బెటరే!
సిటీ అంతా
ట్రాఫికరే!!

Sunday, March 8, 2009

నిత్యం నానే సత్యం
****************


ఎన్నికల్లో
అడగకున్నా వరాలు
ఎన్నికలైతే
తిరుపతి క్షవరాలు!


Saturday, January 31, 2009

అంతా ఘనులే

***********************




అంతా ఘనులే
త్యాగ ధనులే
కుదబెడ్తె చంద్రన్న
తెగనమ్మే రాజన్న

సుధకై మధిస్తే
హలాహలం
వెబ్ వలపన్నామా
వైరస్ మాయా జాలం

నిన్న అమెరికా
కలల కలబోత
నేడు ఆమెరిక
కలతల లత

వలసల అమెరికా
నిన్నటి గాథ
వెతల అమెరికా
నేటి కథ

సాఫ్ట్ వేరంటే
నిన్న వంగి వంగి సలాం
"సాఫ్ట్" వేరై నేడు
అతలాకుతలం

ఆడితే ఆటేదైనా
ఆరోగ్యమే
క్రికెట్ చూస్తే ఏముంది
రోజంతా వ్యర్థమే

కరెంటుకోతలు
పంట కోతలు
నేతల కోతలు
రైతన్న గుండె కోతలు

దిగుబడి-పెట్టుబడి
రాబడి
బై దళారి దోపిడి
రైతు కంటతడి